P6.2-M SHABU NASAKMIT
■UNDERPASS PROJECT.
Mao kini ang aerial view sa eskina sa F. LLamas ug N. Bacalso Ave. sa Barangay Mambaling, dakbayan sa Sugbo nga dunay gitrabaho nga multi-million underpass project ug sugod karong adlawa, ang northbound lane (habig sa Shopwise) ang sirad-an sulod sa gibanabana nga unom ka buwan apan abli na ang southbound lane (habig sa Super Metro). /ALAN TANGCAWAN
Notado nga drug pusher kinsa usa ka high value target (HVT) ang nasikop sa Pardo Police Station diin nasakmitan kini og kapin sa P6 milyones nga kantidad sa shabu.
Human personal nga mitaho sa Pardo Police Station ang concerned citizen kabahin sa ilegal nga negosyo ni Reneil Estomago Monceda, 28, nasikop kini sa Sitio Lawis, Barangay Mambaling, dakbayan sa Sugbo.
Pinaagi sa buy-bust operation niadtong Sabado sa alas 11:50 sa gabii nasikop si Monceda kinsa giisip nga nalakip sa drug watchlist diin nakuhaan kini og 503.9 gramos nga shabu nga nagkantidad og P6 milyones.
Matod ni PO3 Benjamine Maglajos, imbestigador sa maong kaso, nga magbalhinbalhin si Monceda ug sa nagkadaiyang barangay sa dak- bayan sa Sugbo.
Nakuha gikan kaniya ang lima ka dagko nga pakete ug usa ka medium sized nga pakete sa shabu, P5,000 nga halin sa ilegal nga negosyo ug ang P1,000 buy-bust money.
Usa ka oras sa wala pa ang maong operasyon nakasikop usab sa Carbon Police si Ian Catapan sa Sitio Kastilaan, Barangay Ermita, dakbayan sa Sugbo.
Nakuhaan kini og 5.15 gramos sa shabu nga nagkantidad og P60,770.
Samtang sa Catarman, lungsod sa Liloan, nasikop ang magtiayon nga sila si Jaldon Bugtai Pinote ug Annabelle Delica Cañedo diin nakuhaan kini og 10 gramos nga shabu nga nagkantidad og P118,000.
Laing pito ka mga drug user ang nasikop usab diin lakip niini ang pag-umangkon sa gipusil patay nga pulis nga si PO2 Melchizedek Batomalaque.
Nasikop ang 19-anyos nga si Khier Batomalaque diin naatlan kini nga nag pot session sa usa ka beach resort sa Bonbon, Aloguinsan.