MAMBALING TUTOKAN SA CCTO KARON
NORTHBOUND LANE SA N. BACALSO AVE. HINGPIT NGA SIRAD-AN
Tutokan karon uban sa pagpatuman sa bag-ong sistema ang Cebu City Transportation Office ( CCTO) aron ilang mahatagan og alibyo ang gipaabot nga grabeng kahuot sa dagan sa mga sakyanan sa Barangay Mambaling diin nagpadayon ang underpass project. Si Francisco “Isko”Ouano,
operation head sa CCTO, nagkanayon nga dili epektibo ang 6:00 am - 2:00 pm (paingon sa north) ug 2:00 pm - 6:00 am (paingon sa south) sanglit naghuot gihapon ang mga sakyanan nga nakamugna og grabeng trapik atol sa dry run niini bisan walay klase.
Gumikan niini, nahukman ni Ouano ug Konsehal Dave Tumulak nga ilang sundon ang ilang kanhi sistema nga gituman sa karsada habig sa Shopwise dihang gitrabaho pa pikas habig.
Karong nga nitabok na usab ang construction diin sirado na ang three-lanes ug ang giablihan sa CCTO ang one-lane habig na usab sa McDonalds (south bound) giablihan na kini 24 oras ug wala na nipa gisunod ang 6:00 am - 2:00 pm vice-versa nga sistema.
Ang mga sakyanan nga mopaingon sa city proper nga molagbas sa maong lugar adto gipaagi sa CCTO sa dalan Cabreros paingon sa Tabada lapos sa dalan Vestil ug kon gikan sila sa Pardo mahimo sab silang mosubay sa dalan Tagunol paingon sa ilang destinasyon.
Ang alternate routes nga anaa sa kasikbit sa Mambaling padayon gihapon nga maagian gawas lang sa 3
lanes atubangan sa Shopwise nga maoy padayon nga gitrabaho sa Phase 4.
Dili na usab problema ang trapik sa dalan F. Llamas sanglit maagian ana ang maong karsada paingon sa Metro Gaisano lahos sa south ug mao sab ang E. Sabellano.
Ang pangulo sa CCTO operation nga matag karon ug unya ilang i-manual ang pagdumala sa traffic inay mogamit og traffic light sa junction paingon sa South Road Properties (SRP) sanglit dali ra makita sa enforcer kon asang karsada ang huot ug maoy unahon sa paaagi.
Si Ouano nagkanayon nga tulo ka buwan gikan karon, posible nga maagian na og balik ang one-lane sa habig sa Shopwise ug sa ingon maagian na ang north ug south bound lanes. Gipadayag sa operation
head sa CCTO nga magpadayon ang sistema nga 24 oras makaagi ang southbound
vehicles hangtod mahuman ang phase 4 sa dul-an P700 milyones nga underpass ni Kongresista Rodrigo Abellanosa nga maoy solusyon sa grabeng trapik sa lugar.
Samtang, gipadayag ni Engr. Roy dela Cruz sa DPWH-7 nga kon magsige ang uwan-uwan gumikan sa panahon sa ting-uwan nameligro nga maapektohan ang implementasyon sa proyekto hilabi na ang pagbubo og kongkreto nga semento para sa lane habig sa Shopwise.
Apan gipadayag niya nga dili angay mabalaka ang publiko sanglit on target gihapon ang contractor sa underpass nga gikatakdang mahuman sa Disyembre karong tuiga. /