KALAMBOAN SA CARCAR GIPASIGARBO NI APURA
Gipabuhagay ni Carcar City Mayor Nicepuro Apura ang iyang nahatag nga kalambuan sulod sa iyang tulo ka mga termino nga pagserbisyo sa dakbayan sa Carcar atol sa iyang ikawalong State of the City Address (Soca) niadtong Sabado sa gabii sa atubangan sa Carcar City Hall.
Ang mayor, kinsay nihimo sa iyang katapusang SOCA sa dili pa siya monaug isip mayor, mapasigarbuhon nga mibalita sa iyang nahimo nga kalambuan sa nagkadaiyang sector sa dakbayan sa Carcar sulod sa iyang tulo ka termino.
Unang gipasigarbo sa mayor ang iyang nahimo nga mga diversion road/by-pass road diin mao kini ang unang hangyo sa mga tawo sukad sa iyang paglingkod niadtong 2010.
Gipadayag sab niya ang nahimo nga mga infrastruktura sama sa bag-o nga City Hall,
multi-purpose building ug covered courts sa kabarangayan, bag-o nga Carcar City Public Market nga ablihan karong Nobiyembre ug ang Carcar City College diin naaprobahan na sa kagamhanang ang libre nga tuition fee sa mga estudyante.
Laing gipasigarbo sa mayor mao ang ilang sistema sa matag Purok sa ilang barangay diin napasidunggan kini sa Malacañang.
Gipasiatab sab sa mayor ang iyang nahatag nga kalambuan sa sector sa turismo, agrikultura, peace and order, disaster preparedness ug environmental protection.
Matod sa mayor nga na kuntento siya sa iyang mga nahimo nga kalambuan sulod sa iyang siyam ka tuig nga pag-alagad isip mayor. “I’m very satisfied with my performance. Although naa pa tay wa natiwas nga mga project sa atong dakbayan.” Laing umaabot nga proyekto karun sa dakbayan sa Carcar mao ang ilang City Sports Complex, City Public Terminal nga kabahin sa Carcar City Center nga plano sa Mayor nga anha ibutang sa Poblacion 3.
Wala sab kalimti sa mayor ang pagpasalamat sa iyang mga nahimung kaabag sa iyang pagpanerbisyo sa dakbayan sa Carcar.
Ang Soca sa mayor gihimo atol sa ‘11th Charter Week Celebration’ sa dakbayan ug gitambungan sa inilang mga dinapit sama nila ni Office of the Cabinet Secretary Director Anthony Giles L. Villamor ug 1st District Board Member Yolanda Daan.
“Ang kahimtang sa atong siyudad, naa na sa maayong pagkabutang and that’s the moment
of truth.” dugang sa mayor.