Abuso batok sa kabataan miminos

Nipadayag og kabalaka ang chairperson sa Regional Council for the Welfare of Children (RCWC) sa Central Visayas sa taas nga rate sa exposure sa kabataan sa physical ug sekswal nga pagpangabuso dinhi sa rehiyon nga naglakip sa physical injuries ug intentional mutilation, pagpanglugos ug acts of lasciviousness ug ubang mga kaso sa pagpangabuso.

Apan base sa statistics sa mga kaso sa mga krimen nga gihimo ngadto sa mga bata nga gi-report sa Police Regional Office (PRO) 7, nasayran nga kini nagkakunhod gikan sa 2015 hangtod sa 2017.

Sa 2015, kinatibuk-ang 2,980 ka mga kaso ang natala nga naglambigit og kabataan, nikanaug kini sa 1,919 sa 2016 ug 1,833 sa 2017.

Sa 2,980 ka mga kaso sa 2015, 40.37 porsyento niini o 1,203 ang mga insidente sa physical injuries, nikunhod kini sa 853 sa 2016 kun 44.45 porsyento sa 1,919 ka mga kaso ug 778 sa 2017 kun 42.44 porsyento sa 1,833 ka mga kaso.

Samtang ang mga kaso sa lugos nga maoy ikaduha labing daghang natala sa PRO 7, nabantayan nga nagkaminos usab sud sa tulo ka tuig gikan sa 2015 hangtod sa 2017.

Sa 2,980 ka mga kaso sa 2015, 510 niini kun 17.11 porsyento ang mga insidente sa pagpanglugos; niminos kini sa 426 sa 2016 kun 22.10 porsyento sa 1,919; apan nisaka sa 451 kun 24.60 porsyento sa 1,833 ka mga kaso sa 2017.

Samtang ang combined statistics sa ubang mga kaso sama sa acts of lasciviousness ug ubang mga buhat sa pagpangabuso natala sa 1,205 kun 40.44 porsyento sa 2,980 ka mga kaso sa 2015; 602 kun 31.28 sa 1,919 sa 2016 ug 534 kun 29 porsyento sa 1,833 sa 2017.

Bisan kon nagkaminos ang mga kaso sa mga krimen nga naglapas sa katungod sa kabataan, gihulagway ni Department of Social Welfare and Development (DSWD) 7 Regional Director Evelyn Macapobre, chairperson sa RCWC, nga alarming ang statistics.

“Due to their age, children are vulnerable to violence which has both short and long term effects that the child may not recover from,” sumala ni Macapobre sa iyang suwat nga gibasa ni Grace Yana, technical focal person sa RCWC 7 atol sa press conference sa International Justice Mission (IJM) niadtong Biyernes.

Matod sa director nga base sa mga pagtuon, ang nasinati nga bayolenting panghitabo magbilin og physical, mental ug emosyonal nga kadaut sa bata, diin ang bata mahimong maoy direkta nga biktima o testigo.

Siya nidugang ang bayolenteng mga panghitabo mahimo mahitabo sa balay, sa tunghaan sa komunidad, sa publikong lugar, bisan sa trabahoan o sa cyber space.

Si Macapobre nanawagan sa lainlaing mga haligi sa hustisya nga seguraduon nga mahatagan og prayoridad ang mga kaso nga naglambigit og kabataan ug pahamtangan og silot ang mga naghimo niini.

Siya nihangyo sa tanang sektor nga motabang nga masumpo ang tanang matang sa pagpangabuso sa kabataan./

Children who are exposed to violence are more likely to suffer from attachment problems, regressive behavior, anxiety and depression, and to have aggression and conduct problems.”

- DSWD 7 Regional Director Evelyn Macapobre