Cordova dili hotspot sa OSEC: IJM

Ang aktibo nga paningkamot sa kagamhanan sa lungsod sa Cordova sa pakig-alayon sa hingtungdang mga ahensiya sa gobiyerno ug non-government organizations ang hinungdan nga daghan ang mga nasakpan nga nag-cyber pornography ug mga nagbuhat og online sexual exploitation of children (OSEC).

Si Cordova Mayor Mary Therese Sitoy-Cho nipasabot nga tungod sa ilang paghigugma ug pagpanalipod sa kabataan batok sa OSEC ug hugot nga kampanya pagsumpo niini, nahibaw-an ang mga nagbuhat og OSEC.

“We choose to be proactive, and expose OSEC criminals to protect our children rather that keep quite and protect our image,” padayag sa mayor sa press conference sa International Justice Mission (IJM) sa miaging semana.

Si Cho nanghinaut nga dili na himuon nga cyber porn capital ang Cordova.

“We have 10,000 roses. That’s the land of the 10,000 roses, not the land of cyber,” dugang niini.

Samtang, sumala ni Atty. Lucille Dejito, director sa legal interventions sa IJM Cebu, ang lig-on nga structural resources sa usa ka lugar, ang aktibo nga law enforcement ug hugot nga koordinasyon sa lainlaing mga ahensiya sa gobiyerno ang yawe sa pag-ila sa mga nalambigit sa OSEC.

Siya nidugang ang sunodsunod nga ronda sa awtoridad sa usa ka lugar sama sa Cordova wa magpasabot nga usa na kini ka hotspot.

Sukad sa 2011 hangtod sa Hulyo 2018, matod ni Dejito, 98 na ka mga operasyon nga gipaluyohan sa IJM ang nahimo sa awtoridad batok sa OSEC, diin 142 sa mga responsabli sa tibuok nasod ang nakasohan na ug 60 niini ang gikan sa Kabisay-an.