Trapik sa N. Bacalso Ave.

Sa mga mobiyahe nga moagi sa tunnel project sa eskina sa dalan F. Llamas ug N. Bacalso Ave. sa Barangay Mambaling sa dakbayan sa Sugbo, maayong molikay na lang mo daan sa pag-agi sa dapit tungod sa posibleng kalibog sa dagan sa trapiko mugna sa pagpagsira sa northbound lane (habig sa Shopwise) karong adlawa sulod sa tulo ka buwan alang sa pagtrabaho sa phase 4 sa multi-milliion nga underpass project sa dapit.

Ang southbound lane ablihan sa trapiko apan alang sa north bound nga mga sakyanan o ang nagpadulong sa sulod sa dakbayan sa Sugbo gikan sa alas 6:00 sa buntag ngadto sa alas 2:00 sa hapon, sama sa nabali sa dagan sa trapiko sa naasoy nga panahon apan, gikan sa alas 2:00 sa hapon ngadto sa gabii, maagian na lang usab kini sa mga sakyanan nga south bound o pagawas sa siyudad sa Sugbo.

Dili ba makalibog?

Apan Department of Public Works and Highways (DPWH) 7 ug Cebu City Transportation Office (CCTO) kagahapon nga aron pa wagtang sa kalibog, ang northbound lane hingpit nga sirado ug ang southbound lane abli alang sa mga sakyanan padulong sa kabahatan.

Hinuon, mubo lang kini nga dalan ang sirad-an nga mokabat lang og 500 metros apan dako kini og epekto sa dagan sa trapiko sa nag-unang dalan padulong sa habagatan. Sa paglikay sa kalibog, mas maayong maglikay una karon sa pagagi sa dapit. Mahimo moagi sa Cebu South Coastal Road sa South Road Properties (SRP) o ngadto sa ibabaw nga bahin sa Barangay Punta Prinsesa ug adto mogawas sa Pardo aron mobalik sa highway sa habagatan.

Mag-antos yud kon dunay kausaban nga gipatuman alang usa sa kasulbaran mismo sa trapiko sa dapit pinaagi sa paghimo og underpass, diin nakaani na og daghang pagsaway tungod sa kahasol nga nahimo lakip sa mga negosyo sa palibot sa dapit.