Ikatulong tulay, Metro Cebu expressway

Gisugdan niadtong miaging Huwebes ang pagtukod sa P22.6 bilyunes nga Cebu-Cordova Link Expressway (CCLEX), ang ikatulong tulay nga magdugtong sa Mactan ug Cebu. Ang groundbreaking ceremony sa maong proyekto, nga gipaabot nga mahuman sa 2021, gihimo niadtong Marso 2, 2017 uban ni Presidente Rodrigo Duterte.

Ang 8.5 ka kilometro nga CCLEX usa ka joint venture tali sa mga kagamhanang lokal sa lungsod sa Cordova ug sa syudad sa Sugbo ug sa Cebu Cordova Link Expressway Corporation (CCLEC), usa ka subsidiary sa Metro Pacific Tollways Corp. (MPTC).

Ang 400 metros nga main span sa CCLEX adunay 60 metros nga navigation clearance aron makaagi ang mga dagkong barko sa ilawom niini. Ang mga dagkong barko di makaagi ilawom sa duha ka mga tulay nga nagdugtong sa mga syudad sa Mandaue ug Lapu-Lapu.

Gipaabot nga ang maong proyekto makapaluag sa kahuot sa trapiko sa Marcelo Fernan bridge ug sa primerong Mandaue-Mactan Bridge. Mao usab kini ang alternate route gikan sa Sugbo paingon sa Mactan Cebu International Airpot.

Daghang mga motorista ang nireklamo sa kahuot sa trapiko sa duha ka mga taytayan nga nagdugtong sa Sugbo ug Mactan, ilabi na sa rush hour. Dunay nabiyaan sa ilang mga flight tungod sa trapiko.

Ang CCLEX adunay kapasidad alang sa 40,000 ka mga sakyanan matag adlaw. Busa, kadtong magdali, mahimong adto na moagi sa ikatulong taytayan inigkahuman niini. Apan usa kini ka toll bridge. Andam na kaha ang mga Sugbuanon nga mobayad aron makaagi sa maong tulay?

Sugdan usab karong tuiga sa Department of Public Works and Highways (DPWH) ang 70 ka kilometro nga Metro Cebu Expressway project gikan sa syudad sa Danao hangtod sa syudad sa Naga.

Si DPWH Secretary Mark Villar namahayag nga ang P50 bilyunes nga proyekto gipaabot nga makapaluag sa kahuot sa trapiko sa Metro Cebu.

Ang DPWH migahin na og P300 milyunes alang sa road right-of-way ug pasiunang civil works sa proyekto nga gipaabot nga mahuman sa di pa matapos ang termino ni Presidente Duterte sa 2022.