Dayalogo og problema sa trapiko

Diyotay nga kabugnaw. Mao ni gusto natong ipaabot sa mga motorista nga nag-antos sa nagka grabe nga kahuot sa dagan sa trapiko sa Natalio Bacalso Ave. og sikbit nga mga karsada sa dakbayan sa Sugbo.

Kini tungod sa mga lalis nga nitumaw karong bag-o nga naglambigit og mga traffic enforcer ug motorista.

Duna say lalis tali sa mga motorista mismo nga nagpasanginlanay nga abusado diha sa karsada.

Di nata mahibung sa mga sitwasyon nga ingon niini. Ang ato nalang awhag nga mapasabot og tarong sa mga enforcer ang kausaban sa trapiko nga gipatuman og sa mga motorista nga magmabugnawon kanunay aron malikayan ang pag gamit ug mga mahait nga pulong tungod lang sa problema sa trapiko.

Dugay na ning problemaha. Gani nagka grabe na og maayo ang sitwasyon.

Kong sa sakit pa daw gi-ICU na ang kahasol nga namugna tungod sa proyekto nga gipatuman.

Ang kanunay nga gibalik balik sa taga CITOM nga panawagan nga unta sabton sa publiko ang sitwasyon. Pero di kalikayan nga ang gihambin nga kapungot sa mga natanggong sa karsada moresulta og di maayo mao nga may mga kabubut-on nga masilo.

Isip kabahin sa SOP kon standard operating procedure katungod sa publiko ang masayod kong unsa na’y esta- do sa maong proyekto.

Nindot sab unta nga may mga dayalogo nga pasiugdahan ang Citom og motorista ingon man representante sa habig sa mga pasahero og sa mga molopyo og sa nag negosyo sa palibot apil na ang taga eskwelahan , aron matuki ang mga isyu nga may labot sa problema sa trapiko.

Dako ang akong pagtoo nga gawas sa taga Citom og DPWH duna pay daghan nga taga South ang makamao nga mangita og solusyon pagpagaan bisan gamay sa kabug-at sa maong problema. Iapil pa nimo ang mga operator sa bus, mini-bus, og jeep de pasaheroan.

Kong mapaminaw ang ilang mga panahom labot sa maong problema basin may matampo sab sila.

Di pa uwahi ang tanan. Gawas sa mga traffic signs suwayan kaha nato pag apply ang gahom sa dayalogo pagpangita og mas malungtaron og epektibo nga solusyon.

HOMECOMING

Ang mga nigradwar sa University of the Visayas Pardo Campus gikan sa 1954 hangtod 2014, giahibalo sa nagsingabot nga grand alumni homecoming sa tibuok adlaw sa petsa 14 og 15 ning bulana.

Adto ni himoon sa new building sa UV Pardo. Akong higala nga si Jojo Pimentel maoy nagpahibalo niini.

Palihug sa pagtawag o text sa numero 0923- 5306885 og 0906-6772723 alang sa dugang kasayuran.