England, Croatia mingkompleto sa WC semi-finals

Human sa tulo ka mga dekada, nakasulod pagbalik sa semi-finals ang England pinaagi sa pagbuntog sa Sweden, 2-0, kagahapon sa Soccer World Cup sa Samara, Russia.

Ang duha ka headers nila ni Harry Maguire ug Dele Alli mao ang nakatukmod sa England sa semis sa labing unang higayon gikan niadtong 1990.

Ning sangkaa, gipakita sa England nga wala sila magsalig og insakto sa leading scorer sa prestihiyusong kompetisyon nga si Harry Kane ug aduna sila’y laing mga magduduwa nga adunay kapabilidad nga maka-goal.

Gawas nila ni Maguire ug Alli, makonsiderar sab nga bayani alang sa England mao ang ilang goal keeper nga si Jordan Pickford, kinsa katulo ka mga higayon nga nakapakgang sa posibleng goals sa Sweden.

“We had to withstand a lot of physical pressure,” matod ni England coach Gareth Southgate.

“The resilience of the team and togetherness of the team today was crucial. Today our spirit was as good as theirs and our quality a little bit better.”

Si Pickford nagkanayon nga dako niyang kalipay nga nakatampo siya og dako ning maong makasaysayong kalampusan sa England.

“I wasn’t born the last time England reached a World Cup semi-final,” matod ni Pickford.

“We have always said we would take one game at a time and we can go on and create our own history.”

Sa semi-finals, ikaharong sa England ang Croatia nga ningdispatsar sa Russia, 4-3, sa laing quarter-finals nga pinatiray.

Sa laing semi-finals nga engkuwetro, magpinatiray ang Belgium ug France.

Magsugod ang gikaintapang semi-finals karong Miyerkules (RP time).