Mga Peñalosa mingbukbok sa Indonesians

Nagkinahanglan lang og 2:30 minutos sa second round si undefeated Dave Peñalosa aron idespatsar ang Indonesian fighter nga Ricky Mabufoe sa main event sa Rumble in Bohol boxing promotion sa miaging gabii sa Bohol Wisdom School gym sa Tagbilaran City.

Bisan pa man og dul-an na sa duha ka tuig nga wala makasaka ibabaw sa ring apan gipakita sa anak ni kanhi world champion Doddie Boy Peñalosa ang iyang kaisog pinaagi sa pag-ataki ni Mabufoe gikan sa pagbagting sa unang round.

Kaduha gyud kahigayon mahagsa ang Indonesian sa ikaduhang round sa wala pa hingpit nga undanga sa referee ang away.

“Nindot ni nga comeback fight para nako, almost two years wa ko kaaway kay permi kuwang sa praktis. Karon magsigi nakog ensayo para permi nako makaaway,” matod ni Peñalosa.

Ang uyoan nga si Gerry Peñalosa sa GerPens Promotions naglaraw nga iyang paawayon si Dave og mga dekalidad ug may pangalan nga mga local fighters.

“Gusto nako kanang lisod ug lig-on nga kontra kay aron gyud matistingan ning iyang abilidad,” matod ni Gerry kinsa naglaraw nga mopahigayon og laing promotion sa bulan sa Septiyembre sa Cebu.

Sa kadaugan, si Dave padayong nag bitbit sa limpiyong 13-0 nga baraha nga may siyam ka knockouts.

Ang ig-agaw ni Dave nga si Carl Caesar Penalosa malampuson usab nga mikastigo ug mipatalikod sa laing Indonesian fighter nga si Iwan Key.

Usa ka solidong straight ni Carl ngadto sa apapangig ni Key sa 1:20 segundos sa ikalima nga round maoy nagyawe sa ika-13 nga daog batok sa usa ka pildi.

Sa laing away, gipahunong usab sa kanhi Ala Boy Mark Bernaldez si Ryan Bungkawil sa 2:59 sa second round.

Midaog si Rollen Getalada pinaagi sa unanimous decision batok Reyce Cutillas, gilupig usab ni Jeco Suico si Kervent Aresco (UD), ug gi-knockout ni Mark Anthony Rotilles si Elluterio Germo sa ikatulong round.