679 bag-ong scholar ubos sa Paglaum Scholarship
Tulo ka mga tinun-an nireklamo human nga gipaadto sa distribusyon sa certificate alang sa mga nadawat sa Paglaum Scholarship Program sa Kapitolyo apan wa diay sila sa lista.
Bise Gob. Agnes Magpale niklaro nga kadto lang nakadawat og opisyal nga tawag o komunikasyon sa ilang opisina maoy nadawat nga mga bag-ong scholar.
Pormal nang gipangapud-apod ang certificates alang sa mga bagong iskolar sa Paglaum Scholarship Program sa Kapitolyo.
Moabot sa 679 ang mga bag-ong scholar karong tuiga. Wa pay labot sa di momenus 700 usab ka mga scholar nga unang nadawat sa tuig 2017.
Dako ang kalipay sa scholar nga si Chile June Delumbar sa Sayaw, Barili, ilabi na kay dakog tabang sa iyang pagtungha ang madawat nga P1,500 nga allowance matag buwan gikan sa provincial government.
Kon unsa kalipay ang mga scholar nga nakadawat sa ilang certificate, susamang kaguol ang gibati sa tulo ka mga tinun-an nga gikan sa lungsod sa Aloguinsan human nga wa diay ang ilang pangalan sa opisyal nga listahan sa mga bag-ong scholar.
Nihangyo sila nga di ipublikar ang ilang mga pangalan ug ipakita sa media ang ilang dagway.
Matod sa usa kanila nga nagtungha na sa 1st year college, may kanhi opisyal sa ilang dapit nga maoy nagpahibawo kanila nga nadawat sila sa Paglaum Scholarship Program ug paadtuon sila sa Kapitolyo kagahapong adlawa alang sa pagdawat sa ilang certificate.
Sigun sa tinun-an, alas 3 sa kaadlawon siya nigikan sa Aloguinsan sa tinguha nga di ma-late sa distribusyon.
Igo na lang siya sa paghilak dihang nasayran nga di siya apil sa mga nadawat nga tinun-an.
“Pag-abot nako diri, wala ko. Mao na. Mao ra ko og na-down kay abi biya sa akong mama paggikan nako, nga madala ko. Then wala man,” naghilak nga gipadayag sa tinun-an.
Nangayo og katin-awan ang mga tinun-an kang Magpale labot niini apan dihang gisusi ang master list, wa sila niini.
Sigun ni Magpale nga wa sila magsugo og mga lokal nga opisyal o laing tawo gawas sa staff sa iyang opisina pag-contact sa mga nadawat nga scholar.