Sayop nga tayming

Taliwa sa kabalaka sa mga mayor dinhi sa Sugbo sa sunodsunod nga mga pagpamatay sa lokal nga mga opisyal sa Luzon, gi-recall sa Police Regional Office (PRO) 7 ang mga police escort sa mga mayor. Si Tuburan Mayor Democrito “Aljun” Diamante, pangu sa kapunongan sa mga mayor sa lalawigan sa Sugbo, niawhag na gani sa iyang kaubanang mga opisyal nga di mokompyansa. Kon wa silay police escort, magkuha sila og kaugalingong security personnel.

Niadtong Marso, si Daanbantayan Mayor Vicente Loot gi-ambush, apan wa maunsa. Naangol ang ilang duha ka mga sinaligan nga nagsakay sa van nga maoy gitirohan sa mga gunman.

Kon wa pa makaipsot si Loot, mas una pa unta siya sa laing mga mayor nga gipamatay.

Si Loot gitumbok ni Presidente Rodrigo Duterte nga nalambigit sa illegal drugs sa Kabisay-an. Apan nanghimakak si Loot sa mga alegasyon.

Si PRO 7 Director Chief Superintendent Debold Sinas namahayag nga di angay nga mabalaka ang mga mayor sa ilang seguridad kay mahimo ra silang makahatag kon duna may hulga.

Apan nganong i-recall o hilabtan pa man ang mga personnel nga naka assign sa mga mayor taliwa ning mga hulga? Di ba, mas maayo ganing pahugtan pa ang seguridad, inay i-recall?

Kining lakang karon sa Philippine National Police (PNP) di maayo og tayming taliwa sa sunodsunod nga mga pagpamatay sa local chief executives. Makapadugang kini sa kabalaka sa mga mayor bisan niadtong wa giapil sa narco list sa presidente.

Di baya kalikayan nga sa ilang pagbuhat sa mga tahas isip mayor, duna silay nangaligsan, labina kon sila aktibo batok sa drugas. Kon sindikato ang ilang naligsan, posibleng manimawos ning mga tawhana.

Isip mga pulitiko, duna usab silay mga kontra sa pulitika. Basin baya dunay nagplano og dautan kanila. Busa,sayop gyud ang tayming ining lakang sa mga opisyal sa kapulisan.