‘Dili ko burikat’

Di ko siguro kon gibisaya ba o giiningles ni Barangay Kapitan Niña Mabatid. Apan matod pa sa mga nabiktima sa usa ka insidente mga alas 4 pasado sa kaadlawon sa miaging Hunyo 19, 2018, gilitok sa kapitan ang mga pulong, “I am not a whore.”

Mao kini ang napatik sa mga affidavit nilang Wendell Pepito, security guard, ang duty manager nga si Irene Lacerna, ug si Edwin Acuyan, ang OIC general manager sa Waterfront Cebu City Hotel and Casino.

Lakip ang maong affidavit sa reklamong ilang gipangsang-at batok nilang Mabatid ug usa ka Ramon Nacito Floresta,

“Di ko burikat,” kon ihubad sa Bisaya kining “I am not a whore.”

Ngano man nga nakalitok si Mabatid niini?

Si Mabatid nagkanayon nga politikal ang maong isyu kay nidagan siya pagka presidente sa ABC. Niadtong tungora, wa lang gyud siya matratar pag maayo.

Kon atong tuohan ang asoy sa tulo, si Mabatid naabot sa lobby sa maong luhong hotel mga pasado alas 4 sa kaadlawon nga kuyog kini si Floresta.

Kini si Floresta, nga mao ang presidente sa Kidapawan Chamber of Commerce, dakong minyo. Matod pa, hubog ug saba kaayo nga naabot ang duha.

Mao nga giduol silang duha sa security personnel nga si Wendell Pepito dihang nidiretso sa elevator and duha.

Responsibilidad ni Pepito nga sigurohon nga mga guest lang ang tanang manaka sa hotel. Ang wala makarehistro isip guest iyang ingnon nga moagi una sa front desk sa hotel.

Tuod man, gipangutana ni Pepito ang duha nga guest ba kini. Wa damha ni Pepito nga nasuko man hinuon kini si Mabatid.

Niining tungora nga niingon si Mabatid og “I am not a whore. Don’t you know me?”

Ambot lang kini si Pepito nga wa man gyud makaila. Nangutana kini sa room number ni Mabatid kay duna kuno kiniy corporate account.

Kay nakahisgot si Mabatid og numero, gisulat kini ni Pepito apan gisumbag hinuon kini ni Floresta. Sa ngadto-ngadto, gisundan kini og patid sa tiyan.

Naabot man tuod ang duty manager nga si Irene Juliet Lacerna. Apan wa kini makapugong nga masumbagan pag-usab ni Floresta si Pepito. Si Lacerna usab naigo og siko.

Maayo na lang kay nakuha ang maong insidente sa CCTV sa hotel ug nahimong lig-on nga ebidensya batok kang Mabatid ug Floresta.