Please be good to me
Nagdali kong mikanaog sa gisakyan kong dyip depasaheroan sa eskina diin molakaw kog kadiyot paingon sa among balay. Kalit nga mibundak ang kusog nga uwan ug wa ko makadalag payong. Gikan ko sa eskuwelahan ug hapit na mogabii niadtong tungora.
Mipasilong ko sa usa ka tindahan. Nakatan-aw ko kang Arnel nga nagtan-aw sab diay nako. Namuwa na ang iyang nawong. Siya rang usa ang nag-inom, wa ang iyang mga barkada. Tulo na ka botelyang gagmay nga beer ang diha sa ibabaw sa lamesa nga iyang nahimutangan. Mipahiyom si Arnel nako. Gipugos ko ang akong kaugalingon sa pagsmile sab niya.
Nahadlok ko nga masuko si Arnel nako. Giilang burukinto si Arnel sa among lugar sa Mambaling. Kasagaran sa kagubot nga mahitabo sa among lugar siya ang hinungdan. Siya ang sinugdanan. Kanunay siyang makakitag away sa among dapit.
Spoiled siyang pagka anak, kay gawas nga bugtong anak, anak pa gyud og dato. Puparehas lang kamig edad apan second year college gihapon siya samtang ako graduating na sa kurso nga akong gikuha. Unsaon man gud, bugoy siya. Panagsa ra mosulod sa iyang klase maong kanunay daghan og failed nga mga subject inig closing na sa klase.
Kusog nga mikuba ang akong dughan dihang mitindog si Arnel lug miduol nako. Ang mga babaye sa among lugar naglikay kaniya tungod sa kahadlok. Wa ko magtingog dihang nagtindog na siya sa akong atubangan. Iyang gihubo ang gisul-ob niyang jacket ug gihatag nako.
“Ipandong ni Reena. Morag dugay pang motuang ning uwana.”
Hinay ang tingog ni Arnel. Wa ko dayon dawata ang jacket.
“S-Salamat na lang, Nel.”
Hapit di makagawas ang akong tingog. Gipanid-an ko ang reaksiyon ni Arnel kon nasuko ba siya nako tungod sa akong pagbalibad niya. Apan wa koy kasuko nga nakita sa iyang nawong. Nagpahiyom nuon siya nako.
“Sige na gud, Reen. Tan-awa, gabii na. Daghan ra bang bugoy ning atong lugar. Nuon, nia man ko nga manalipod nimo.”
“Kining, salamat na lang gyud, Nel. Sige, ha, moadto na ko.”
Wa ko na huwata ang tubag ni Arnel. Nagdali kong mibiya niya. Nagpasinguwan na lang ko kay di ko gusto nga magdugay ang among pag-estorya ni Arnel. (SUMPAYAN)