MARIJUANA QUEEN NASIKOP SA PULIS
Bayot nga giila nga “Marijuana Queen” ang nadakpan sa buy bust sa Barangay Tejero, dakbayan sa Sugbo human nga nakuhaan og upat ka kilong marijuana nga mobalor dul-an sa tunga sa milyon.
Ang nasikop giila nga si Junemar Cabahug alyas “Kharla”, 23, ug naila usab ning alyas “Marijuana Queen” lumad nga taga Davao Del Sur nga nag-abang og balay sa Sitio Silangan, Barangay Tejero.
Matod ni Chief Insp. Ma. Theresa Macatangay, hepe sa Abellana Police Station 2 sa Cebu City Police Office, nga nakadawat sila og reklamo sa mga lumolupyo sa Barangay Kamputhaw diin una siya nga nagpuyo may labot sa pagpamaligya niini og marijuana.
Tungod niini mihimo gilayon og surveillance ang kapulisan ug nasuta nga mibalhin na kini og pinuy-anan sa Barangay Tejero human mapagya na ang iyang pangalan sa mga silingan.
Kagahapon sa alas 4 sa kaadlawon milusad ang drug enforcement unit sa Station 2 og buy bust nga miresulta sa pagkasikop ni Cabahug.
Si Cabahug nakuhaan usab og upat ka kilong pinauga nga dahon sa marijuana nga adunay kinatibuk-ang kantidad nga P480,000.
Miangkon si Cabahug n atol sa gihimong imbestigasyon nga iyaha ang mga marijuana nga gisulod sa dagkong garapon.
Giingong sa siyudad sa Danao magkuhaan sa iyang supply si Cabahug nga iya usab nga ipang apod-apod sa mga drug player sa siyudad sa Sugbo. “According to him sa among
initial nga paghinabi niya nga iya kunong personally gikuha sa Danao. Kung asa ni sa Danao it is a subject of an intelligence report nga among i-submit sa among higher headquarters for purposes of
coordination sa other units,” matod ni Macatangay.
Sa laing bahin, moabot sa P240,000 nga balor sa marijuana plantation ang na-ibot sa mga sakop sa City Mobile Force Company sa Sityo Mapas Barangay Tagbao, bukirang dapit sa siyudad sa Sugbo.
Moabot ngadto sa 300 ka mga punoan sa marijuana ang ilang napang-ibot gikan sa usa ka hilit nga luna sa barangay.
Nangulo sa operasyon ang hepe sa CMFC nga si Supt. Christopher Navida.Nakadawat og kasayuran ang CMFC labot sa marijuana plantation nga maoy hinungdan nga ilang gisubay gamit ang drone.
Nagpalupad sila og drone og nasuta ang mga anihonon na nga mga punoan sa marijuana.
Wala silay nadakpan nga gituohan nga nananom niini apan aduna na silay gipangdudahan nga ila pang gipaubos sa imbestigasyon.