Amahan gipatay sa anak
Ulo sa amahan nasi-ak human gitagbas sa hubog nga anak niadtong Martes sa udto sa bukirang bahin sa Barangay Baye, lungsod sa Asturias.
Si Teofilo Celin, 63, ang namatay gumikan sa mga tinigbasan nga iyang naangkon human nga gihapsan og sundang sa iyang kaugalingong anak nga si Marlon, 25, ulitawo og mangulingay.
Si SPO1 Douglas Maravillas, sa Asturias Police Station nga nahinabi sa Superbalita Cebu nagkanayon nga ang biktima nakaangkon og duha ka samad tinigbasan diha sa iyang ulong resulta sa pagka-siak niini ug laing tinigbasan sa abaga.
Sumala pa sa pulis nga sa wala pa ang kremin ang amahan ug ang suspek ug laing igsuon niini ang nani-udto ug nagkalingaw og inom sa ilimnong makahubog samtang nagpaabot sa ilang gihimong uling duol sa ilang gipuy-an.
Sa dihang nangahubog na ang amahan ug ang suspetsadong anak nagkalalis.
Na-ugkat ang ilang mga karaang panagbangi hinungdan nga nikuha og sundang ang anak gitigbas niini ang iyang amahan hangtud nga namatay.
“Nagdumot daw ning anak sa iyang papa nga maldito unya seloso, kanunay nga manapat sa iyang mama tanang tawo selosan” dugang ni SPO1Maravillas.
Ang laing igsuon ni Marlon nga ila usab nga gika-inom niadtong higayona ang wala maka-uwang sa panghitabo kay nakatulog gumikan sa kahubog og nakurat nalang nga patay na ang iyang amahan.
Ang suspek bolontaryong mitahan sa barangay tanod kinsa maoy mi-turn over ngadto sa kapulisan. Kasong parricide ang gi-andam sa kapulisan batok sa suspetsado human ang nakahukom ang inahan nga pasakan og kaso ang iyang anak.