Demolisyon wala matiwas
Wala matiwas og bungkag ang 88 ka mga balay sa C. Arellano boulevard, Cebu City gumikan sa pag-ulbo sa tensiyon dihang nibabag ang mga molupyo.
Si Raquel Bohol-Arce, pangulo sa Prevention Restoration Order Beautification Enhancement ( PROBE ) kinsa maoy nipatuman sa demolisyon igo lang nakagusbat og 5 ka mga balay.
Gibasehan ni Arce sa paghawan sa mga balay nga illegal nga gitukod mao ang clearing order nga gipirmahan ni Mayor Tomas Osmeña.
Gumikan sa posibleng pag-ulbo unya sa kagubot, si Arce nimando sa iyang mga tawo sa temporaryong paghunong sa pagguba sa mga balay human iyang nadawat ang mensahe gikan sa mayor.
Si Osmeña sa iyang bahin nibutyag nga hatagan niya og duha ka semana ang illegal settlers sa pagbalhin sa dili pa niya manduan og balik ang POBE sa pagpadayon sa demolition.
Ang mayor nagkanayon nga andam siyang maminaw sa habig sa mga apektado aron usab masuta ang ilang mga yangungo og problema karong adlaw nga Huwebes.
Ang mga molupyo sa C. Arellano nangangkon nga wala sila mahatagi og igong panahon aron makapangandam ug wala sab sila hatagi og lugar nga ilang kabalhinan.
Apan si Arce nagkanayon nga wala sila nagkuwang sa pagpahibawo ngadto sa mga residente ug nakapadala na usab og mga notisya ang iyang buhatan sa wala pa sila niguba sa mga balay sanglit matod pa niya nga protocol sa PROBE ang paghimo niini.