Kinahanglan usbon

Human sa mga isyu nga gibato batok kaniya niadtong panahon sa barangay elections, laing kontrobersiya ang giatubang ni Mabolo Barangay Captain Niña Mabatid. Nikatap sa social media ang video diin nakigkomprontase si Mabatid sa house detective ug sa duty nga manager samtang nakita sa samang footage nga nadapatan ni Dr. Ramon Floresta ang duha.

Nipasabot si Mabatid nga nahimo nila kadto tungod kay gitratar siyang sama sa usa ka “pokpok” o escort girl. Nainsulto siya sa gibuhat sa house detective kay usa diay siya sa mga dagkong guests sa mao nga hotel tungod. Anha niya ipahigayon sa mao nga hotel ang mga kalihukan sa iyang kompaniya.

Natural sa usa ka tawo nga mo-react kon ingon niadto ang pagtratar kay di lalim nga usa ka ka kliyente nga dako, apan gipakaubos ang pagtan-aw. Wa man sab gud siya mailhi.

Apan angay usab nga huna-hunaon ni Mabatid nga human siya mosulod sa pulitika ug malampuson sa iyang tinguha, di na siya ang kanhi negusyante lang. Usa na siya ka public official.

Isip public official, kinahanglan mas patas-an pa ang iyang pasensya kay mosugot man siya o dili, ang iyang kinabuhi ibutang na sa microscope. Bisan gagmay nga butang, mahimong padak-on sa iyang mga kaatbang.

Kining nahitabo sa hotel, angay nang mag-amping si Mabatid sa sunod nga higayon. Bisan pag moingon ang iyang kampo nga dunay nagpaluyo nga pulitiko, labina nga nadungog siyang modagan sa Association of Barangay Councils (ABC) nga mag-eleksyon karong Hulyo 30, ang gitan-aw sa publiko mao ang iyang gibuhat taliwa sa iyang pagkakapitan. Di na maminaw ang katawhan sa mga sirkumstanya.

Niini, kinahanglang usbon na niya ang iyang mentalidad karon, kana kon gusto siyang mo-survive sa hugaw ug gubot nga kalibutan sa pulitika.