Health care, insurance sa tanan
Hayan nga makab-ot na ang pangandoy sa tanang mga Pilipino nga adunay silay health insurance coverage. Duna nay mga Pilipino nga ubos sa Philippine Health Insurance System (PhilHealth), apan dili ang tanan.
Nakaingon kita nga hayan nga makab-ot kini human sa pagsertipikar ni Presidente Rodrigo Duterte nga urgent o dinalian ang pagpasar sa Universal Health Coverage bill sa ika 27 nga Cabinet meeting niadtong Lunes sa gabii.
Unsa man ang ipasabot niini? Kon ang usa ka balaudnon isertipikar sa Presidente nga urgent, ang maong balaudnon mag-una sa mga balaudnon nga pagatukion sa Kongreso, mahimo kining top priority.
Ang House of Representatives, sa boto nga 222-7, nipasar niadtong Septyembre 6, 2017 sa ikatulo ug katapusang pagbasa sa House Bill Number 5784, ang Universal Health Coverage (UHC) bill.
Si Senador Sonny Angara nipasaka niadtong Enero 31, 2018 sa Senate version sa UHC, ang Senate Bill No. 1673. Si Senador Joseph Victor “JV” Ejercito naglaum nga mapasar kini sa Senado sa pagbukas pagbalik sa sesyon karong buwana human kini isertipikar nga urgent sa Presidente.
Matod pa ni Ejercito ang pagsaka sa presyo sa mga nagunang palaliton ingon man sa produkto sa lana ug sa transportasyon lakip sa mga hinungdan nga kinahanglan nga ipasar ang maong balaudnon.
“I applaud President Rodrigo Duterte’s decision to certify the bill as urgent. Hoping to work on the passage of this landmark legislation once we resume session,” matod pa ni Ejercito. Matod pa niya, sa 2016, 54.2 porsento sa galastohan alang sa panglawas giabaga sa katawhan, samtang 34.2 lang ang giabaga sa gobyerno.
Unsa man ang nahilakip sa Universal Health Care bill? Naglakip kini sa tanang inpatient kuon pasyente nga na-admit a hospital, outpatient, emergency care services, preventive, promotive, curative, rehabilitative and palliative medical dental and mental health services.
Ubos sa maong balaudnon, reorganisahon ang PhilHealth ngadto sa Philippine Health Security Corporation (PHSC), nga mahimong “national purchaser of health services.”
Ang pagpasakop sa UHC mahimong contributory ug non-contributory. Kadtong nagtrabaho sa gobyerno ug mga pribadong kompaniya paamuton, samtang ang mga indigents kun mga kabus way amot. Ang Department of Social Welfare and Development (DSWD) maoy mosagubang sa transportasyon, kapuy-an ug pagkaon sa mga kabus nga pasyente.