P800 MIL NGA SHABU NASAKMIT
Pito ang nangasikop samtang moabot sa kapin P800,000 nga kantidad sa shabu ang nasakmit sa awtoridad sa nagkadaiyang operasyon batok gidili nga drugas sa dakbayan ug lalawigan sa Sugbo.
Kagahapon sa ala 1:00 sa hapon, duha ang nasikop sa mga sakop sa Talisay Police Station sa Barangay Jaclupan.
Lima ka minutos lang ang diperensiya sa pagkasikop nila ni Vanroy Saavedra Abastas alyas Banroy, 31; ug ni Brix Montebon Racal alyas Soroy, 21, human sila pulos madakpi sa Purok 4, Brgy. Jaclupan, dakbayan sa Talisay.
Nakuha gikan kang Abastas ang 12.25 gramos sa shabu nga nagkantidad og P82,500.
Samtang si Racal kinsa nasakpan nga nagbitbit og drugas, nakuhaan og 0.5 gramos sa shabu nga nagkantidad og P5,000.
Ang buy-bust operation gipangulohan ni P/Supt. Marlu Palomaria Conag, acting chief sa Talisay Police Station, uban sa Drug Enforcement Unit team nga gilangkoban nila ni P03 Yvonne Ilustrisimo, SP02 Emerito Sansan, P03 Arthur Santillan, P02 Stephen Sefuesca, P02 Raden Escanillan Jr., P02 Marlon Añabeza, P02 Raymond Lleve ug P02 Joseph Bejer.
Samtang niadtong Biyernes pasado alas 6:00 sa gabii sa Sitio Camansi, Barangay Mambaling, dakbayan sa Sugbo, nasikop si Christian Cubil alyas Chanak, 28.
Nakuhaan kini og shabu nga aduna’y gibug-aton nga 5.24 gramos nga nagkantidad og P61,823.
Samtang niadtong Huwebes, tulo ka mga suspetsado ang nakuhaan og dul-an P300,000 nga balor sa gidili nga drugas sa Sitio Gochan Caduloy, Barangay Tisa, siyudad sa Sugbo.
Ang mga nasikop mao sila si Nicolas Bauso Fuentes, Noel Bacarisas Fuentes, ug Niño Bacarisas Fuentes.
Nakuhaan ang tulo og 25 gramos sa shabu nga nagkantidad og P295,000.
Sa Sitio Mahayahay, Barangay Calamba, nasikop usab si Adro Dullano, 42, diin nakuhaan kini og 55 gramos sa shabu nga nagkantidad og P374,000.
Ang mga nangasikop pasakaan sa kapulisan og mga kasong kalapasan sa Republic Act 9165 kun Comprehensive Dangerous Drugs Act of 2002.
Sila nagtingkagol karon sa prisohan samtang giandam ang mga kaso nga ipasaka batok nila sa gihingusgan nga kampanya sa kapulisan batok sa gidiling drugas.