Cpadao migamit sa mga SSG batok gidili nga drugas sa mga tunghaan

Cebu Provincial Anti-Drug Abuse Office (Cpadao) masaligon nga mo-qualify na ang Sugbo sa search for best Barkada Kontra Droga (BKD) sa tibuok nasod.

Kini subay sa pagka-establisar na sa BKD sa mga tunghaan sa high school sa probinsiya sa Sugbo.

Ning bag-o lang ang mga opisyal sa Supreme Student Government (SSG) sa mga eskwelahan ang gipaubos sa seminar labot sa ilang papel pag-iway sa ilang kaubang mga tinun-an sa bisyo sa illegal nga drugas.

Nagtapok ang gibanabanang 500 ka mga opisyal sa SSG sa nagkadaiyang public high school dinhi sa Sugbo, lakip na ang ilang mga adviser, alang sa Barkada Kontra Droga seminar.

Ang CPADAO ug Provincial Youth Commission maoy nangulo sa kalihukan ug gi-tap niini ang representante sa Dangerous Drugs Board (DDB) sa kaulohan aron mopasabot sa kabataan sa ilang papel sa kampaniya batok droga.

Matod ni CPADAO Executive Director Ivy Meca, ang SSG maoy gigamit aron mas daghang kabataan, ilabi na mga tinun-an, ang maabot sa mensahe sa dautang epekto sa illegal nga drugas.

Atol sa seminar, gipili usab ang mga opisyal sa BKD Council sa probinsiya.

May gihimo sab sila nga plan of action nga maoy ilang isugyot sa tagsa-tagsa nila ka mga Municipal Anti-Drug Abuse Council (Madac), alang sa konkretong anti-drug project sa BKD.

Gihulagway ni Meca nga sa miaging duha ka tuig, malampuson nga napatuman sa BKD ang plan of action labot sa pag-apil sa mga ginikanan ug mga magtutudlo sa regular nga monitoring sa kabataan, paglikay kanila sa pagsulod sa bisyo.