Tinabangay, di away

Nagsugod na ang away nga giladlad na sa publiko nila ni Cebu City Mayor Tomas Osmeña ug Land Transportation Office (LTO) Regional Director Victor Emmanuel Caindec. Sa usa ka press conference niadtong Huwebes, gipikhan ni Caindec si Osmeña kalabot sa wa mangarehistro nga mga sakyanan sa Siyudad ug sa trapiko sa Barangay Mambaling.

Iya usab nga gisaway ang gibuhat sa mayor diin gipang-impound og 60 ka mga adlaw ang mga sakyanan nga nasikop kay nag counter flow. Matod ni Caindec nga ang dunay gahom sa pag-impound mao ang LTO. Ingon pa niya, mahimong makakiha kang Osmeña sa korte ang kadtong mga tag-iya sa mga sakyanan nga na-impound.

Ingon pa ni Caindec, napugos siya sa pagluwat ning mao nga mga pamahayag tungod sa pagsige og panaway ni Osmeña sa LTO nga iyang gidumala karon.

Kini si Caindec di tawo ni Osmeña kay nakaserbisyo siya sa panahon ni kanhi mayor Michael Rama isip pangu sa Cebu City Transportation Office (CCTO). Giila usab siya nga gipaluyohan ni Presidential Assistant for the Visayas Michael Dino.

Nailhan na si Osmeña nga magsige og panaway ug pangaway sa mga opisyal nga di niya kaalyado o di mopatuo kaniya, sama ni Caindec nga nakalingkod sa mao nga buhatan nga di siya ang nag-endorso.

Ning ilang away karon, seguradong mapagan ang publiko kay ma-hostage ang kahimtang sa trapiko. Nihulga si Osmeña nga sugod ugma, iyang pabiyaan sa traffic enforcers ang Mambaling area aron ang LTO na maoy modumala niini aron masuwayan ang abilidad ni Caindec.

Kon ang LTO nay modumala sa trapiko sa mao nga dapit, makaya pa kaha sa ilang personnel? Daghan pa kaayog problema ang mao nga ahensya, unya pun-an pa.Sa pagkakaron, ang gikinahanglan pagtinabangay, di away.