‘Sorry God’, Digong

Human niya gitawag ang Ginoo nga ‘stupid’ mga duha ka semana ang nakalabay, karon nangayo og pasaylo sa Ginoo si Presidente Rodrigo Duterte. Naputos sa mga pagsaway ang Presidente human siya miluwat og pamahayag nga ‘God is stupid’. Nunot kadto sa padayong panadsungi tali ni Digong ug sa kadagkuan sa Simbahang Romano Katoliko.

Daghang misaway sa Presidente ug gitawag siya og bisan unsa na lang nga pangalan. Niadtong miaging adlaw, nagtagbo ang Presidente ug kadagkuan sa Catholic Bishop Conference of the Philippines (CBCP) ug nagka-uyon nga motamud og ‘ceasefire’. Buot ipasabot nga ilang ihunong ang ilang panagsukliay og mga pagsaway.

Niadtong miaging adlaw usab nagtagbo sila si Digong ug Brother Eddie Villanueva, pangulo sa Jesus Is Lord Movement, usa ka born again religion ug didto nahitabo ang pagpangayo ni Digong og pasaylo sa Ginoo. ‘Sorry God’, matod pa sa Presidente.

Siguro nakombensi si Digong sa mga relihiyusong grupo o indibiduwal sama kang Brother Eddie nga mangayo og pasaylo sa Ginoo kay dili angay nga basulon ug kontrahon ang Ginoo. Apan matod pa sa Presidente nga sa Ginuo lang siya mangayo ug dili sa mga tawo o mga opisyal sa simbahan.

Unya karon, kadtong mga tawo nga grabeng nakasaway ni Digong kaniadto mga iyang gitawag nga ‘stupid’ ang Ginuo, angay na pod siguro karon nga modayig kaniya human siya mangayo og pasaylo sa Ginuo. Dili baya usab nato mabasol si Presidente Duterte nga misaway sa simbahang Katoliko gumikan kay daghan man usab nga salawayon sa taga simbahan.

Pero ang pagsaway sa Ginuo maoy dili maayong gibuhat kay wala kita dinhi sa kalibutan kon wala ang Ginuo ug Siya maoy nagbuot sa tanan sa atong pagpakabuhi ning madangog nga kalibutan. Ang relihiyon dili makaluwas kanato. Igo lamang kini nga mogiya kanato aron masubay kita sa maayong dalan. Gi-isip lamang kini natong tamdanan kay ang tanan aduna may limitasyon ning kalibutan. Amen.