No-El mobaraw sa Federalism

Nitukar na sab si House Speaker Bebot Alvarez. Karong nahuman na ang ConCom sa proposed federal constitution, naghisgot na sab ang hanggaw og No-El kun No Election.

Nakahibawo na man kita nga usa sa nakapatay sa mga paninguha nga usbon ang Batakang Balaod mao kining isyu nga No-El. Mao kini ang nahitabo sa mga Cha-Cha attempts sa panahon ni Presidente Fidel Ramos ug Gloria Macapagal-Arroyo.

Duha ka rason ang akong nakita nganong makabaraw sa tinguha karon nga usbon ang Batakang Balaod aron mahimo na kining federal constitution.

Una, ang mga Pilipino gusto kaayo og eleksyon. Mao kini ang regular nga bugno nga atong giatangan matag tulo ka tuig alang sa pagpili sa atong mga lider. Hikawi sila niini kay siguradong mabanlas ka sa ilang kalagot.

Ikaduha, klaro kaayo nga ang No-El igo lang makabenepisyo sa pipila ka mga hakog nga politiko nga gusto lang ma-extend ilang termino.

Si Speaker Alvarez pananglit nahadlok man nga kontrahan siya ug mapildi didto sa unang distrito sa Syudad sa Davao.

Teritoryo man kini nilang Mayor Sara Duterte ug mga kaubanan sa Hugpong ng Pagbabago.

Sa akong pag-aninaw sa politika, nagsugod na sa pagrekrut og mga local parties ang kampo ni Sara aron modaog ang ilang mga suportahang senador ug mahimong mayoriya ang mga kongresistang kontra ni Alvarez.

Atong nalantaw nga nahulga si Speaker Alvarez niining maong lakang sa kampo ni Mayor Duterte diin apil ang kaatbang sa speaker nga si Kong. Tony Boy Floirendo.

Unsaon man sab kini si Alvarez nga nagpadala man sa bangi sa iyang kabit batok sa uyab ni Tony Boy. Dayon si Floirendo na hinuon ang iyang gigukod.

Nakalimot ang Alvarez nga sa iyang paglansar, si Floirendo ang nitabang niya.

SARA UG BONG

Unsa kahay mahitabo sa Sugbo tungod niining maong kalambuan sa politika?

Una, duna usay mga politiko nga naa sa kampo sa administrasyon apan magka-atbang sa local nga mga katungdanan.

Ikaduha, makita unya nato nga magka-atbang ang mga local nga politiko ang modala isip kandidato alang sa pagka senador ni SAP Bong Go.

Di pa ko masiguro kon modagan ba gyud si Mayor Sara pagka senador bisan pa man og popular kaayo siya sa mga survey.

Di sab ko mahibulong nga popular sab siya kon duna may maghimog survey kinsa ang angay modagan pagka president sa 2022.

Apan sa pagkakaron, dako gyud nga hinanggaw ni Speaker Alvarez kining iyang pagduso sa No-El.

Unsaon man sab kini si Alvarez nga nagpadala man sa bangi sa iyang kabit batok sa uyab ni Tony Boy. Dayon si Floirendo na hinuon ang iyang gigukod.