Please be good to me
Wa magdugay si Samuel sa among balay. Hapit na mogabii sa iyang pagpauli. Gusto ko siyang ihatod sa eskina tungod sa akong kabalaka nga pareglahan siya nila ni Arnel. Apan wa magpahatod si Samuel. Nasabtan ko siya, di siya gusto nga maubos ang iyang pagka lalaki.
“I can manage myself, Reen.” “Take care na lang, Sam.” Apan dihang milakaw na si Samuel, hilom ko siyang gisundan. Kon buhatan siyag daotan nila ni Arnel, mopataliwala ko. Nagtuo ko nga maminaw si Arnel nako. Di siya gusto nga masuko ko niya. In-love gud siya nako. Apan wa man hilabti nila ni Arnel si Samuel. Gipasakay pa gani ni Arnel si Samuel og dyip. Hilom kong nalipay. Tingali girespetaran ko ni Arnel kay ako man ang kauban ni Samuel.
Minglabay ang pipila ka adlaw. Wa ko na makita si Arnel nga nag-estambay kada hapon sa suki nilang imnanan sa eskina. Wa na siya maghuwat nako sa akong pagpauli matag hapon. Hain man kaha siya, no? Wa na man ko makakita niya? Hilom kong nakaingon. Unya usa ka hapon, nagkasakay mi si Belinda, manghod ni Arnel nga nag-eskuwela na sab sa college.
Nakatupad mig lingkod. Nagkaestorya mi.
“Matay si Kuya, Te Reena, mikalit lag kabuotan. Kanunay nang mosayo pag-adto sa eskol. Gisusi nila ni Mama ug Papa ang iyang gitunghaan. Kanunay na siyang mosu’od sa iyang klase, wa nay absent.” “Mao ba, Lin? Maayo nuon.” “Na-in-love man tingali si Kuya. Kon kinsa man ang girl nga iyang love, magpasalamat mi si Mama ug si Papa niya. Nausab ang kinaiya ni Kuya tungod sa maong girl. Wa na sab makigbarkada si Kuya, uy, Te Reena.”
Wa na ko motubag kay nahiabot na mi si Belinda sa eskina nga among kanaogan. Apan sa hilom, naka-smile ko. Ambot ba, nalipay man gyud ko sa akong nahibaw-an gikan sa igsuon ni Arnel? Na, unsa man kaha ning gibati ko, uy? Nakaingon ko sa akong kaugalingon.
Usa ka gabii, namisita si Samuel nako. Giubanan pa gani siya ni Arnel.
Gitan-aw kog maayo si Samuel. Nakalakaw na si Arnel. Naluoy ko kang Samuel apan angay lang gyud siya makahibawo sa tinuod, nga wa gyud koy gugma niya. SUNOD GULA) (TAPUSON