Anthony misalikway sa bench role
Napanglantawan nga mahimong free agent si Carmelo Anthony karong offseason bisan kon ang Oklahoma City Thunder makakumpleto sa paghimo og “complicated trade” batok sa ilang star aron makadaginot og milyones dolyares.
Si Mark Stein sa New York Times nihulagway nga labing paborito nga mapadulngan ni Anthony mao ang Houston Rockets aron makamugna sila og laing big 3 nga langkuban ni NBA MVP James Harden, Chris Paul.
Ang lumad nga taga New York nga si Anthony wala mohaom sa ilang panag-uban ni kanhi NBA MVP Russell Westbrook ug Paul George sa niaging season.
Ang 34 anyos nga Melo nag-average og 16.2 puntos, 5.2 rebounds ug 1.3 assist sulod sa 78 ka duwa sa Thunder uniform nga maoy labing ubos niya nga average.
Ang coaching staff sa Thunder nangita kon unsaon nila aron mahimong epektibo si Anthony sa ilang organisasyon ug usa sa ilang nahunahunaan mao ang paghimo niini nga maoy mangulo sa second unit sa Thunder apan gisalikway kini sa kanhi All Star.
“Yeah, I’m not sacrificing no bench role.That’s out of the question,” padayag sa kanhi star New York Knicks.
Si Adrian Wojnarowski ug Royce Young sa ESPN nipahibawo nga kon magkabuwag ang dalan ni Anthony ug sa Thunder, ang Oklahoma maka-save og $100 milyones sa ilang gasto.
Kon madayon siya sa Rockets, makatabang si Anthony para sa Houston aron ilang atbangan ang 2 time defending champion Golden State Warriors ug ang Los Angeles Lakers sa pagpangulo ni Lebron James.