TINUN-AN NAGHUBO ALANG SA PROJECT
Usa ka 15 anyos nga babaye ang nidangop sa buhatan sa kapulisan ug gireklamo ang usa ka langyaw nga iyang gituohan nga maoy nagpakatap sa iyang hubo nga hulagway sa social media.
Bugti sa P5,000, naagni ang tinun-an sa paghatag sa iyang hubo nga hulagway ngadto sa usa ka langyaw nga iyang nakaila pinaagi lang sa social media.
Matod sa biktima nga si Maria (di tinuod pangan), ang iyang amiga, nakapadala na sab og hubo nga hulagway ngadto sa langyaw, nga naka-base sa laing nasod og nakadawat kini sa gipasalig nga kantidad sa kwarta nga maoy nakapag-agni kaniya nga mobuhat usab sa ingon.
Dugang pa sab niya nga napugos siya sa pagpadala sa maong hulagway aron makapalit sa iyang gikinahanglan nga requirement alang sa usa ka project sa skwelahan.
“Ning-ahat na lang mi adto, kinahanglan man sab kaayo. Para project (requirements) namo,” sigon ni Maria.
Niadtong Hulyo 25, napadala na sa tinun-anan ang hubo nga hulagway niya sa maong langyaw apan wala siya nakadawat sa gipasalig niini nga bayad.
Inay, nikatap na hinuon sa social media ang maong hulagway.
Si PO2 Rosalyn Gilbert sa Women and Children's Protection Desk (WCPD) sa Talisay Police Sation, nagkanayon nga human nikatap ang maong hulagway, matod sa ginikanan sa biktima nga na-uwawan gyud og maayo ang ilang anak ilabi na kay hapit tanang silingan nila ang nakakita niini.
“They will be assisted by the social worker for psychological evaluation. Pero if we need further action ani, we will refer the victim to the cybercrime office for further investigation,” matod ni Gilbert.
Giawhag usab niya ang mga kabatan-onan ilabi na ang mga babae nga dili mohimo sa ingon ug dili sab dayun mo salig sa mga tawo nga dili pa sinati.
“Dili dayon ta magpatintal, magpadala kon unsa'y offer to avoid ingani nga situation. Kay it’ll end up the (minors) being the victim and mauwawan sab, not only the victim but the parents as well,” dugang ni Gilbert.