2 GI-SALVAGE SA BALAMBAN
SA LAING PAGPAMUSIL KAGABII, GWARDIYA PATAY SA LAHUG, CEBU CITY
Duha ka mga lalaki gipang-salvage kagahapon sa alas 5:00 sa kadlawon sa Sitio Mayana Brgy. Gaas, lungsod sa Balamban, lalawigan sa Sugbo.
Mga alas 7:30 kagabii, sa Barangay Lahug, Cebu City, usa ka gwardiya gipusil patay. Sa pasiunang detalye, giila ang gwardiya nga si Wilfredo Sarana, connected sa Eross Security Force Agency sa Mandaue City ug taga Mabinay, Negros Oriental.
Sa Balamban, ang usa sa duha ka mga lalaki gibana-banang nagpangidaron og 30, may gitas-on nga 5’5, kasarangan ang pamanit, ang buhok pina-mohawk ang istelo nga gikagisan ang kilid, nagsul-ob og blue basketball shorts nga naay letrang OKC, kasarangan ang panglawas, nagsul-ob og blue green t-shirt nga nagisi-gisi ug Adidas nga sapatos kolor itom.
Gawas niini ang usa nila dunay patik nga tribal sa iyang tuong bukton, ug sa iyang tuong buko-buko nga usa ka “Kuros” ang tumoy pinataas sama sa ikog, ingon man usa ka babaye nga cartoon charater.
Si SPO3 Benedicto Bobilles, imbestigador sa Balamban Police Station nga nahinabi sa Superbalita Cebu, nagkanayon ang usa sa mga lalaki adunay tulo ka samad pinusilan sa iyang walang bahin sa ulo.
Samtang ang laing lalaki adunay mga samad pinusilan sa tuong agtang ug mata, gibanabanang nag-edad og 30, 5’3 ang gitas-on, kasarangan ang panglawas ingon man pamanit niini nagsul-ob og faded maong
shorts ug sleeveless t-shirt nga kolor dark grey, nagsul-ob sa pink nga Adidas nga tsinelas. Ang mga biktima nailhan ug gi
claim na mga alas 6:30 kagabii. Usa nila si Dennis Lastimoso samtang ang ikaduha naila lang sa alyas Tambok, kanhi overseas foreign worker (OFW). Ang duha pulos taga dan B. Rodriguez, Sambag 2, dakbayan sa Sugbo.
Sila giila ni Bernard Nuevo, ig-agaw og tagsa ni Lastimoso. Si Nuevo, taga Pondol, Balamban, apan kasamtangang nagpuyo sa B. Rodriguez.
Si Nuevo nisulti sa kapulisan sa Balamban nga wa siya masayod nganong naabot ang duha ka mga lalaki sa dapit.
Matod ni Bobilles, wa pa nila masuta kun unsay motibo sa krimen hangtod way mga kabanay nga moila niini.
Gibutyag niini nga gi-salvage ang mga lalaki sa wa matinong gunmen nga nagsakay og itom nga motorsiklo nga way plaka.
Sumala pa niini nga usa ka lumolupyo sa lugar nga si Fidel Zabate maoy nakadunog sa kumusyon dayon nakadungog sa buto-buto ug nakakita sa awto nga itom nga daling mibiya paingon sa dakbayan sa Sugbo.
Si Zabate nga diha sa iyang panimalay mga 30 metros ang gilay-on sa daplin sa karsada nitumbok nga nagligdas ang duha ka mga biktima.
“Nakabati siyag komusyon sa gawas unya mi-ana daw ning mga biktima nga wala mi sala sir ato ning estoryahon, dayon upat ka sipang buto-buto sa armas,” sumala ni Bobilles.
Daling mibiya ang awto nga itom paingon sa dakbayan sa Sugbo, nagdali sab sila si Zabate ug mga silingan sa pagsusi nagligdas ang mga patayng lawas sa duha ka lalaki daplin sa dalan.
Apan ang ubang mga residente sa lugar sa atbang nga bahin mibutyag nga ang awto nga itom human sa nahitabo misirit ug mi-U turn balik paingon sa Balamban.
Si Bobilles miingon nga nakita sab nila ang markings sa mga kamot sa duha ka lalaki nga dunay agi sa paghikot.
Nagtuo sila nga sa dihang gisakay kini sa awto gipanggapos ang mga kamot sa pagabot sa lugar gitangtangan gipakanaog dayon gipamusil apan way kabhang nga narekober sa crime scene./