Cebu City Prosecutor di mo-inhibit
Mitukod ang Cebu City Prosecutor’s Office og
three-man panel nga hiniusang moresolbar sa mga kasong gisang-at sa National Bureau of Investigation ug Criminal Investigation and Detection Group (CIDG) 7 batok sa mga suspek sa kamatayon ni PO3 Eugene Calumba.
Way plano ang Cebu City Prosecutor’s Office nga mo-inhibit pagsulbad sa mga reklamo.
Niluwat og kamanduan si Cebu City Prosecutor Liceria Rabillas pagtukod sa three-man
panel nga maoy moresolbar sa kasong homicide nga gisangat sa NBI7 batok sa driver/
body guard ni Tejero barangay councilor Jessielou Cadungog nga si William Macaslang ug sa kasong murder ug frustrated
murder batok gihapon ni Macaslang ug Cadungog.
Maglangkob sa panel silang Deputy City Prosecutor Maria Teresa Casiño, Senior Assistant Prosecutor Ghandi Truya ug Assistant City Prosecutor Maria Liza Jorda.
Matod ni Rabillas nga usahon
pagresolbar ang mga reklamo sanglit naglambigit man kini sa samang mga personalidad ug insidente, nga niresulta sa kamatayon ni Calumba ug pagkaangol sa police asset nga si Michael Banua niadtong Lunes.
“Yes (usahon), all cases filed. It’s because it involves the same parties and the same incident,”
niingon si Rabillas.
Dunay mga spekulasyon nga nagtumbok nga angayang mo-inhibit ang Cebu City Prosecutor’s Office sa pagresolbar niini tungod usab kay nagdawatan ang mga piskal ug allowance sa Cebu City Government. Si Mayor Tomas Osmeña, nga maoy labing taas nga opisyal sa siyudad, nisuporta nilang Cadungog ug Macaslang.
Apan sigun ni Rabillas, dunay igong katakos ang ilang buhatan pagresolbar sa maong mga kaso ug wa silay plano sa pag-inhibit niini.
Wa usab sila ma-pressure pagsulbad niini kay di kini ang unang higayon nga nihupot sila og kontrobersiyal nga kaso.
“I don’t see any reason nga
mag-inhibit ang prosecutor. The whole office? Also, I don’t see any reason for the entire office of the Cebu City Prosecutor’s Office to
inhibit,” sigun sa piskal.
Wa pay tataw nga timeline kanus-a maresolbar sa panel ang mga reklamo apan sigun sa city prosecutor, angayang masulbad kini sa labing dali nga panahon human usab napahigayon na ang inquest proceedings.
Gihangop sa kampo sa mga sinumbong ang katukuran sa panel apan nanghinaot si Atty. Benjamin Militar nga di nila dali-dalion ang pag-resolbar niini ilabi na ang posibleng pagsaka sa kaso ngadto sa korte.
Gusto ni Militar nga moagi kini sa regular nga preliminary investigation.
Samtang, gipahibawo ni Militar nga mopasaka ang iyang mga kliyente og kasong attempted murder ug illegal
possession of firearms batok sa police asset nga si Banua ug buot nilang apilon kini sa pag-resolbar sa natukod nga
three-man panel.
Sa samang kalamboan, kon ugali nga mapriso si Cadungog, mamahimo ra kining maka-file og leave aron pabilin kini nga molingkod sa iyang pwesto.
Matod sa legal officer sa Department of Interior and Local Government (DILG) 7 Ian Kenneth Lucero nga mamahimong magpabilin sa iyang pwesto si Cadungog taliwala sa mga giatubang niini nga kaso gumikan sa kamatayon ni Calumba.
Dugang ni Lucero, kinsa mao usab ang chief sa Local Government Monitoring and Evaluation Division, nga bisan paman og adunay giatubang nga kaso si Cadungog mahimo gihapon kining maka-perform sa iyang trabaho, basta lang wa kini ma-detain o makombikto.