GMCAC MIPAUSAB SA GUTTER
Corrective measures ipatuman sa Terminal 2 sa tugpahanan sa Mactan sa katuyoan nga dili na masubli ang nahitabong pagbaha sa passsenger drop-off ug link bridge atol sa pagbunok sa uwan sayo ning semanaha.
Ang GMR Megawide Cebu Airport Corporation (GMCAC) base sa ilang giluwatang press statement miklaro nga nahitabo ang pagpundo sa tubig-uwan sa maong dapit gumikan sa sayop nga pagkataod sa gutter system sa link bridge nga wa mahisubay sa actual design niini.
Aduna nay gihimong corrective works sa maong dapit apan tungod sa sunod-sunod nga pagbunok sa uwan hinungdan nga adunay pagkalangay ang pagtrabaho.
Mipasalig ang GMCAC sa publiko nga sa higayon nga makorehian ang gutter system wa nay mapundo nga tubig uwan, sanglit mosubay na kini ngadto sa rain water drainage system nga gikatakdang matapos sa dili pa ang Agusto 20.
Aron sab sa pagsiguro nga dili mosalibo sa higayon mobunok ang uwan adunay itaod nga side grills o special roll-down plastic nga magsilbi unyang salipod.
Apan sa higayon nga magpadayon ang baha, dugang drains ang ibutang sa link bridge area.
“GMCAC assures the flying public that it is working on solutions that will ensure that these kinds of situations, no matter how slight will not be repeated,” tipik sa press statement sa GMCAC.
Sa sayo pa, nangayo og pasaylo ang tagdumala sa GMCAC human niadtong baha nga nasinati sa link bridge ug passenger drop-off niadtong adlawng Martes.
Tungod sa hitabo, nangayo sila og pagsabot sa publiko samtang nagpadayon pa ang ilang transition phase diha sa bag-ong terminal sa maong Mactan Cebu International Airport.