Bahala na ang Ombudsman: Garcia

Kanhi mayor sa Dumanjug nga si Nelson Garcia nagtuo nga ang pagkabali sa dismissal order batok sa iyang kaatbang nga si Mayor Efren Guntrano “Gungun” Gica, wala magpasabot nga wala siya makahimo og kalapasan.

Gani gipadayag sa kanhi mayor nga ang pagpahimulos ni Gica sa doctrine of condonation, sama ra ug giangkon niya nga nakahimo kini og sayop.

Sa nasayran, gibali sa Court of Appeals ang una nang desisyon sa Office of the Ombudsman nga nagtaktak kang Gica sa katungdanan tungod sa Aguinaldo doctrine.

Ang Ombudsman una nang niluwat og dismissal order batok sa mayor tungod sa dishonesty ug grave misconduct, nunot sa giingong gipaburot nga bayranan sa pagkaon niadtong 2014.

Nasang-at ang reklamo batok ni Gica niadtong 2014 dihang usa pa siya ka bise mayor.

Apan matod sa CA, ang iyang pagkapili nga mayor sa 2016 elections, nagpasabot nga gipasaylo siya sa iyang mga konstituwente sa iyang kalapasan.

“It’s tantamount to accepting nga sayop siya. Ni-avail man siya sa condonation,” niingon si Garcia.

Girespeto ni Garcia ang desisyon sa CA ingon man ang hingpit na usab nga pag-asumir og balik ni Gica sa pagka-mayor sa Dumanjug.

Gitugyan na lang niya sa Ombudsman ang posibleng pag-apelar sa CA decision ngadto sa Korte Suprema.

Masaligon hinuon siya nga positibo nga mamahimong resulta sa kasong kriminal batok ni Gica, nga nagung-ong sa Sandiganbayan.