Osmeña wa molarga

Gikanselar ni Cebu City Mayor Tomas Osmeña ang iyang biyahe ngadto sa Estados Unidos alang unta sa usa ka minor surgery tungod sa iyang kabalaka sa kahimtang sa kalinaw ug kahusay sa syudad sa Sugbo.

Ang iyang giingon nga hinungdan mao ang pagbanhig kang Earl Rallos, usa ka opisyal sa Philippine Drug Enforcement Adency (PDEA) 7, ug ang pagsuway sa pagpatay kang kanhi Tejero barangay captain ug karon konsehal Jessielou “Jing-Jing” Cadungog. Ang maong mga hitabo, matod pa niya, nakapabalisa sa mga Sugbuanon.

“I have decided to postpone my medical trip to the US. It is not critical anyway, and my duty to reassure the Cebuanos in these uncertain times is more important,” nagkanayon si Osmeña sa iyang post sa Facebook.

Matod pa ni Osmena, di siya gustong mobiya sa Sugbo samtang ang mga Sugbuanon gihakop sa kahadlok. “I do not want to leave if the people of Cebu are living in fear. They are the top priority. So until we begin to find the answers that will put them at ease, I will remain in Cebu,” matod pa niya.

Si Earl Rallos, assistant operations chief sa Philippine Drug Enforcement Agency (PDEA) 7, gibanhigan sa wa pa mailhing mga mamumuno nga riding-in-tandem niadtong Hulyo 27 sa eskina sa mga dalan Escario ug Villalon duol sa Kapitolyo.

Samtang ang kaso ni Cadungog, vice chairman sa Opascor, lubog pa kaayo. Si Cadungog, nga ubos karon sa kustodiya sa National Bureau of Investigation (NBI) 7, niingon nga siya gisuwayan sa pagpatay. Apan si Police Regional Office (PRO) 7 Director Debold Sinas nihingan kaniya nga primary suspect sa kamatayon ni PO3 Eugene Alcuin Calumba.

Ang NBI nipasaka na og kasong homicide batok kang William Macaslang Jr., ang driver ug bodyguard ni Cadungog, tungod sa kamatayon ni Calumba niadtong Lunes sa buntag didto sa T. Padilla Extension.

Wa pay kasong gipasaka batok kang Cadungog. Apan ingon sa di siya ganahang mobiya sa kustodiya sa NBI 7.

Ang gikahibudngan ni Osmena mao nga ang survivor sa assassination attempt nahimo nang usa ka suspetsado samtang ang driver sa giingon nga hitman nahimong usa ka protected witness. Kon di ni matubag madugay gyud og larga paingon sa gawas si Mayor Osmena.