NBI vs. PNP

Si Tejero Barangay Councilor Jessielou Cadungog, mi-insister nga gisuwayan siya og ambush sa usa ka pulis nga nagsakay og motorsiklo niadtong Lunes sa buntag sa T. Padilla Estension, Barangay Tejero. Sumala ni Cadungog nga dili siya sakay sa iyang sakyanan sa dihang gipusil sa iyang driver-bodyguard nga si William Macaslang, Jr. si PO3 Eugene Calumba nga sakay sa motorsiklo ni Michael Banua, usa ka civilian asset. Apan ang Criminal Investigation and Detection Group (CIDG) mibarug nga diha sud sa sakyanan ang konsehal sa dihang nahitabo ang pagpamusil.

Gipasakaan nag sumbong homicide sa National Bureau of Investigation (NBI) 7 si Macaslang nga ubos sa ilang kustodiya. Apan sa dihang gipasaka na kini ngadto sa Office of the Cebu City Prosecutor miabut ang mga operatiba sa CIDG kay buot nilang dakpon aron ilang makustodiya sila si Macaslang ug Cadungog. Gipugngan sila sa mga sakop sa NBI ug sa kaulahian miuyon ang CIDG nga anha lang gihapon kini sila sa NBI. Samtang ang kaso nga gipasaka sa NBI kang Macaslang homicide lamang, kasong murder ang gipasaka sa CIDG batok kang Macaslang ug frustrated murder batok kang Cadungog. Karon ang NBI dili na mohinayon pag-file og kasong murder batok kang Banua. Nganong nabugnaw na man ang NBI? Ila na bang itugyan ngadto sa kapulisan si Macaslang ug Cadungog?

Sa laing bahin nangisug si PRO7 Director Chief Supt. Debold Sinas sa pagpanalipud sa namatay nga si PO3 Calumba kay naghimo lagi kuno kini og legitimate police surveillance. Apan si Mayor Tomas Osmeña hugot nga milaban kang Cadungog. Unsa may baruganan ni Cebu City Police Director Royina Garma niining maong isyu? Magkabangga kaha ang PNP ug si Osmeña?

Murag milugak na si kanhi mayor Mike Rama sa iyang kanunay nga gipahibawo nga modagan siya sa pagka-mayor sa umaabut nga eleksiyon. Nahitabo kini niadtong Miyerkoles sa dihang iyang gipahibawo nga kon si Bise Mayor Edgar Labella maoy ituboy pagka-mayor sa ilang grupo mahimo na lang siyang modagan pagka-bise. Iya usab hinuon nga gisugyot nga kon siya ang paluyohan sa mayoriya sa Team Rama – PDP Laban nga mobise usab unta kaniya si Labella. Samtang gipasalamatan ni Labella ang kanhi mayor apan wala siya maghisgot nga magbise lang kang Rama.

Kon basihan ang baruganan sa mga konsehal ug mga kapitan sa oposisyon dakung mayoriya kanila buot nga si Labella maoy ilang standard bearer. Kumpiyansa na si Rama nga makuha niya ang suporta sa mayoriya sa ilang partido o nabugnaw na ba siya sa sunod-sunod nga kapildihan sa ilang grupo batok sa BOPK?

Lain na usab nga tabi-tabi nga umaabut na gayud kuno ang suspension ni Mayor Tomas Osmeña. Naghinamhinam ang oposisyon niini tungod kay sumala nila kadtong kadaugan ni Kasambagan Barangay Kapitan Franklyn Ong nga maoy milansang sa mayoriya sa BOPK sa konseho walay epekto tungod kay daghan kuno unyang mga konsehal ang mamali sa Team Rama. Bisan sa damgo lang?