Makatupong kaha ang bag-ong F4 sa orihinal
Niadtong aktibo pa ko isip kawani sa goberno, atangan gyud ni nako ang bulan sa Agosto kay daghang pista opisyal. Nag-una ani ang Founding Anniversary sa Cebu Prov sa Agosto 6.
Unya naa pay National Heroes Day ug Ninoy Aquino Day. Karon, kini na lang sa Agosto 6 akong giatangan kay mobisita ko sa Kapitolyo ug mangumusta sa kahigalaan. Alams nah!
Nagkatipon ang pipila ka mga taga Kapitolyo adtong Dominggo didto sa Carcar City. Niduyog mi sa kasub-anan ni Noli Vincent Valencia sa pagpanaw ug paglubong sa iyang inahan nga si Maam Petra.
Pagkahuman sa seremonyas, naka-posing pa gyud mi kuyog ni Bishop Jose Palma. Magmahay ka pa ana?
Na-curious ko aning bag-ong Meteor Garden nga hapit na sugdan pagpasalida sa telebisyon. Mao man gud kuno ni ang nagpa-uso sa mga Asianovela ug nagpasikat sa upat ka mga lalaking artista nga nailhan isip F4.
Ang pangutana: makab-ot kaha sa bag-ong bersyon ang pagkasikat sa orihinal? Magkabuang sab kaha ang mga babaye sa upat ka bag-ong F4?
Nindot ang pagdala ni JC Santos sa iyang papel isip Marco sa pagpakig ginukdanay niya kang Coco Martin (Cardo) nga kauban si Yassi Pressman (Alyanna) adtong Miyerkules.
Nakuryoso na hinoon ko unsa kaha ang papel ni JC sa The Day After Valentines nga isalida na sunod semana (kon wa ko masayop). Kauban ni JC dinhi si Bela Padilla.
Nahuman tingalig sayo ang syuting sa The Hows of Us kay imbes Septyembre pa isalida (sumala sa unang pamahayag sa Star Cinema), karon na mang Agosto 29 kini ipagawas sa mga sinehan.
Sila si Kathryn Bernardo ug Daniel Padilla ang mga bida dinhi. Ma-imadyin na pod nako nga morag masudlag dautang ispirito ang mga magdadayeg sa duha kon mobisita sila dinhi sa Cebu.
Atangi lang ang pahibalo dinhi sa pahina sa Laysho.
Nalingaw ug nalipay ko sa resulta sa Game 3 tali sa San Miguel ug Brgy. Ginebra tungod kay dako kaayo ang labaw sa San Miguel.
Magpaabot na sab ta nga sa Game 4, maninguha na sab ang Brgy. Ginebra nga makabalos. Alegre! Atong atangan.