Take me in your mind
Nahikatawa na lang ko. Unsaon, nakalitan man ko sa gipangutana ni Renren nako. Gawas pa wa ko makasabot.
“Porbida nimo, uy, Ren. Gilibog man ko nimo. Unsa gud nang pangutanaha?”
“Sus, girl sab ko, uy, Roselle, parehas ta. Nakasabot man ko sa imong mga lihok ba. Secret love man nimo si Gabriel.”
Mitukikig katawa si Renren. Mora kog natuk-an sa iyang giingon. Matay, nakamatikod gyud diay si Renren sa hilom kong feeling kang Gabriel.
“O, wa ka man makatingog, Rose? Sakto ko, no?”
“D-Di man tinuod nang imong pagtuo, Ren.” Hapit di mabuka ang akong baba.
Sa paminaw ko sa akong kaugalingon, mora kog nahilis sa kauwaw. Apan nganong mauwaw man tuod ko? Babaye ko nga makamaong mahigugma? Duna koy kasingkasing nga mopitik sa pagmahal ngadto sa opposite sex? Gawas pa, buwag na karon sila si Renren ug Gabriel?” “Ayaw ko limdi, Rose.” Miginhawa kog lawom kaayo. Nganong limdan ko man sab tuod ang akong friend?”
“Bitaw, Ren, hilom kong nain-love kang Gabriel. Pero di ko traydor nga pagka amiga, ha. Wa ko man siya iloga nimo.”
Mikatawag kusog si Renren.
“Ayaw paghunahuna ana, uy, Rose. Malipay gyud ko kon mapunta si Gabriel nimo. know you very much. Wa kay uyab ug mituo ko sa imong giingon kaniadto nako nga kon makig-boyfriend ka, kanang laki nga true love gyud nimo.”
“Pero ikaw man gihapon ang gihunahuna ni Gabriel, Ren. Morag naglisod pa siya sa pag-move-on.” Nasagmuyo ko. “Aside from that, basig di ko higugmaon ni Gabriel.”
“Moabot ra ang panahon nga makadawat na siya sa nahitabo sa among relasyon, Rose. And that time, molingi na siyag laing girl. Who knows nga ikaw ang maong babaye?”
Nalipay ko sa pagdasig ni
IRenren. “Unta, Ren, mao nay mahitabo.” Pagka ugma, nagkakita mi si Gabriel sa school canteen. Milingkod ko sa lamesa nga iyang nahimutangan. Noodles, hotcake ug softdrinks ang akong giesnak. Softdrinks lang ang kang Gabriel.
Nakita man tuod ko niya apan morag layo kaayo ang dagan sa iyang hunahuna. Morag blangko ang iyang panghunahuna.
Misamot ang kaluoy ko kang Gabriel. Hilom kong nakaingon kon tug-anan ko ba kaha siya ning tungora nga duna nay boyfriend si Renren?
(SUMPAYAN)