2 KA PULIS KAUBAN NI BALILI GIRELIBO

Gihulagway ni Cebu City Mayor Tomas Osmeña nga cover-up o pagtabon sa kamatuoran ang gihimo sa Police Regional Office PRO 7 may labot sa kamatayon ni SPO1 Roderick Balili, kinsa gidudahan nga maoy nagpusil patay sa agent sa Philippine Drug Enforcement Agency (PDEA) 7 sa dakbayan sa Carcar.

Ang PRO7 pinaagi sa ilang hepe nga si Chief Supt. Debold Sinas niingon nga naunay sa iyang armas si Balili samtang nagpahigayon og surveillance sa lungsod sa Pinamungajan dihang kalit nga nibuto ang iyang Gloc pistol dihang gitunol sa iyang kauban.

Giingong duha niya ka mga kaubang pulis girelibuhan ug gipakuhaan og armas sa PRO 7.

Apan si Osmeña wa nituo sa pamahayag ni Sinas ug iyang gihulagway nga nagpamatuod nga adunay kalambigitan ang kapulisan sa sunodsunod nga patay sa Sugbo.

“They’re in the position to cover up everything. I challenge Sinas to produce the car. General, don’t think that the Cebuanos are stupid. You’re making it clear that you’re the enemy of Cebu,” padayag ni Osmeña.

Iyang gibutyag nga masulbad ang maong kaso kon kuhaon ang slug sa bala sa lawas ni Balili ug itandi sa armas nga gigamit ni Von Rian Tecson sanglit atol sa hitabo, nakabawos ang PDEA agent sa wa pa siya paaraki og taas nga armas sa nagsunod nga SUV.

Ang mayor niingon nga kon tinuod pa nga aksidente ang hitabo, nitawag unta og ambulansiya ang mga kauban ni Ballili atol sa surveillance, apan way nadawat nga emergency call ang Emergency Rescue Unit Foundation (Eruf ) ug ubang ambulance team.

Gisaway usab ni Osmeña ang tambalanan sanglit wa mohatag og konkreto nga kasayuran bahin sa hitabo ni Balili ug para sa mayor usa kini sa mga timailhan.

TULO ANG PINUSILAN?

Nipasangil si Osmeña nga di duha ka samad pinusilan ang naangkon ni Balili kon di tulo sukwahi sa pamahayag sa kapulisan.

Ang mayor niingon nga gipahibawo siya sa attending physician sa operating room nga usa ka samad pinusilan sa bukton ug duha sa dughan ang naangkon ni Balili.

Gumikan niini, gusto ni Osmeña nga ipagawas ang autopsy report sa lawas ni Balili aron maklaro ang tanan.

Samtang duha ka pulis nga kauban ni Balili sulod sa sakyanan diin giingong naaksidente sa iyang armas gipaubos na sa pre charge investigation sa PRO 7.

Giparelibuhan na sa katungdanan ug gipang-imbargohan na sa ilang armas sa Regional Special Operations Group (Rsog) 7.

Matod sa hepe sa Rsog 7 nga si Supt. Reyman Tolentin nga ang ipaubos sa pre-charge investigation sa Regional Investigation and Detective Management Divison mao silang SPO1 Jonathan Buscato ug PO1 Justine Padillo.

Kon mamatud-an sa imbestigasyon nga sad-an ang duha ka mga pulis, mahimong suspensohon ug ang labing dako nga silot wagtangon sila sa serbisyo, matod ni Tolentin.

Niadtong Biyernes sa gabii namatay si Balili tungod sa kadaot nga nahiaguman niini sa iyang lawas diin nakaangkon siya og duha ka samad pinusilan.

Sa pangutana nganong duha ang igo niini kon aksidente ang hitabo, matod ni Tolentin mahimong nadoble o kaha automatic ang armas nga nibuto.