Oslob nakigsabot sa COA: mayor

Aduna nay kasabotan ang Commission on Audit ug municipal treasurer sa Oslob kabahin sa pagdeposito sa mga kita gikan sa whale shark watching.

Gibutyag ni Oslob Mayor Jose Tumulak Jr. nga nagkasabot na ang ilang treasurer nga si Amelia Sabandal ug ang COA kon kapila sa usa ka semana sila magdeposito sa mga koleksyon.

Ang mayor niangkon nga maglisod sila kon himuon matag adlaw ang pagdeposito.

“Na-okay nana siya. Kay kon sige ta og biyahe, matiktikan unya ta. Kuyaw kaayo ang security sa atoang mo-transport,” pagpasabot ni Tumulak dihang nahinabi sa Superbalita Cebu.

Matod niya, kini usab ang hinungdan nga gipalitan sa kagamhanan sa lungsod og sakyanan ang Municipal Treasurer’s Office aron dunay masakyan inig hatod sa kwarta.

Sa 2017 audit report, ang COA nibadlong sa kagamhanan sa Oslob sa kalangay pagdeposito sa koleksyon gikan sa whale shark watching sa miaging tuig nga ni-average og P1.2 milyones matag adlaw.

Sigon sa COA dihay mga higayon nga naabtan og 18 ka adlaw usa pa madeposito sa municipal treasurer ang koleksyon nga nikabat na sa P23.6 milyones.

Sumala sa COA nga kalapasan sa Item 33.a ubos sa Laws ug Rules sa Cash Examination on the Revised Manual ang kalangay sa munisipyo. Giklaro ni Tumulak nga 30 porsyento lang ang madawat nga bahin sa munisipyo gikan sa whale shark watching; 10 porsyento ang bahin sa Barangay Tan-awan, diin magpakita ang mga tuki nga dagsaon sa mga turista; samtang 60 porsyento sa Tan-awan Oslob Whale Shark and Fishermen’s Association.