Mga pulis nga magbiseklita ipakatap sa dakbayan

Bag-ong mga bisekleta nga gidonar sa Saturn Gaming Corp. ang gi-turn-over kagahapon sa buntag sa kapulisan sa siyudad sa Sugbo aron magamit sa pagpatrolya sa mga sudlunon nga karsada ug sa mga subdivision.

Aron nga mas makita pa ang mga pulis sa karsada, nihatag ang usa ka pribadong kompanya dinhi sa siyudad og 30 ka units sa bisekleta nga mao unya ang mo-roving sa mga sudlunong bahin sa siyudad.

Matod ni Sr. Supt. Royina Garma, direktor sa Cebu City Police Office (CCPO), nga upat ka bicycle team ang naglangkob sa bike patrol nga makita sa kadalanan.

Panahon lang sa kaadlawon hangtod sa buntag ang himuon nga pag-roving sa mga pulis gikan sa police stations ug sa CCPO headquarters ug ilang hangpon ang ubang police official nga moboluntaryo.

Mahimong dili sila maka gukod sa mga riding in tandem criminals apan dako silag matabang sa police visibility patrol sa mga dapit nga walay police nga makita.

Kasamtangan karon nga ilhon sa mga police stations unsa nga dagkong subdivisions nga kanunay nga robingan sa mga pulis panahon sa kaadlawon.

“Ang gamit natin sa bisekleta at least ang mga tao sa subdivision will have an opportunity to established ang contact sa ating kapulisan… masulod sad tong mga dili na robingan sa patrol cars nato,” matod ni Garma.

Gihangop usab sa direktor sa Land Transportation Office 7 Victor Emmanuel Caindec ang paggamit sa bisekleta sa pagpatrolya sanglit nakatabang sa kalikupan ug makaayo sa panglawas.