4 ka kaso batok sa 43 ka dinakpan gikan sa resort
Upat ka mga kaso ang atubangon sa 43 ka mga dinakpan sa nahitabong pagsulong sa Mactan Isla Resort and Casino, Barangay Agus, Lapu-Lapu City niadtong Biyernes sa kaadlawon.
Ang management sa maong establisemento ang mikiha og grave coercion, grave threat, slight illegal detention
ug sa habig sa kapulisan kaso nga obstruction of justice ang gisang-at. Kagahapon gipaubos sa inquest proceedings sa Piskaliya sa Lapu-Lapu City Hall of Justice diin gawas niadtong mga guwardiya sa Proceed Security Agency nga gipasanginlang mi-ilog sa armas sa Blue Breed
security personnel, apil nga gikiha ang pito ka mga Korean national nga stockholder sa Mactan Isla ug ang duha nila ka mga samaron nga security officer ang gi-hospital arrest. Ang manager ug corporate secretary sa establishment nga si Pablo Aloyan miingon nga aduna silay lig-ong ebedinsiya nga magpamatuod sa gihimo sa mga dinakpan ngadto sa ilang security guards nga makita sa ilang CCTV footage. Gipahibawo ni Aloyan nga nibalik sa normal nga operasyon ang Mactan Isla og adunay personnel sa Police Station 4 ug Special Weapons and Tactics (SWAT) team ang gi-detail sa area.
Samtang si Atty. Gerry Carillo, legal counsel sa habig sa Park family ug Proceed Security Agency ang mihangyo sa Piskaliya nga mapadali ang pagsaka sa maong kaso aron nga maka-piyansa ang iyang mga kliyente nga niadto pang Biyernes gi-detain.
Dugang pa nga mosang-at sab sila og counter charges ilabi na nga duha ka mga guwardiya sa Proceed ang nasamdan sa hitabo.
Ang hepe sa Investigation and Detection Management Branch, PSupt. Eloveo Marquez nga 43 ka mga dinakpan mag-atubang og tag-upat ka kaso matag usa kanila.