Kuha sa dashcam makatabang
Ning pagkamatay ni SPO1 Roderick Balili, kinsa gidudahan nga usa sa mga mipatay ni Philippine Drug Enforcement Agency (PDEA 7) agent Von Rian Tecson, mamatay ug maapil na pod kaha og lubong ang kamatuoran sa mga misteryo, gumunhap ug tanggaha nga naglimen sa kamatayon ni Tecson? Adunay mitumaw nga mga tabi-tabi nga si Balili maoy usa sa mga nagpatay ni Tecson.
Nakabawos si Tecson sa mga mi-ambush kaniya sa Perrelos, Carcar City niadtong Miyerkules. Ang nasamdan nga tawo gidala sa iyang mga kauban sa South General Hospital sa Naga City. Didto nailhan si Balili ug dayon gibalhin sa Cebu Doctor’s Hospital. Namatay siya sa Biyernes sa gabii.
Ang version ni Chief Supt. Debold Sinas, PRO 7 director, nga na-unay sa iyang armas si Balili samtang nag-surveillance og usa ka notadong drug pusher sa Pinamungajan. Kon didto mahitabo, nganong sa Naga pa gidala si Balili nga naa may district hospital ang Pinamungajan ug ang lain labing pinakaduol nga ospital mao ang sa Toledo City. Sa hitabo nga ingon niini, ang biktima dad-on sa pinakaduol nga hospital alang sa pasiunang pagtambal o first aid. Unya na dad-on sa mas dako nga hospital kon ma-stable na.
Daghang mga circumtances nga hayan usa si Balili ang mipatay kang Tecson. Una, ang mga mi-ambush ni Tecson nagsakay sa duha ka managlahing motorsiklo ug puwa nga Pajero. Ang nagdala kang Balili sa South General Hospital nagsakay usab og Pajero nga puwa. Adunay kuha sa CCTV doul sa lugar nahitaboan nga nakit-an ang mga sakyanan sa mga mi-ambush kang Tecson nga mao usab ang nagsunod kaniya. Adunay bonnet nga nakuha sa crime scene nga susama sa kuha sa CCTV sa usa sa mga nagsakay sa motorsiklo.
Nganong gipa-isyuhan man og memorandum ang pulis nga igsuon ni Tecson nga si SPO1 Von Tecson sa Carcar police sa pag-turn over niya sa kuha sa dashcam sa sakyanan sa iyang igsuon ngadto sa National Bureau of Investigation (NBI 7)? Wala na ba diay katungod ang igsuon nga motabang sa iyang gipatay’ng igsoon o modangop ngadto sa laing ahensiya sa kagamhanan nga makatabang sa pagsulbad sa kamatayon sa iyang igsoon? Kadtong kuha sa dashcam maoy makatubag sa mga pangutana.