Patay na ang tikarol

Sa kalit nga pagluwa sa mga balod sa isda mao sad ang kaigmat sa tikarol sa pagsakdap niini sa alimpuo sa dagat. Gitangag sa lig-ong sungo sa langgam nga dugayng nagbantay sa tuod ibabaw sa pangpang. Nakit-an ni Simo ang kaabtik sa tikarol sa bentana sa iyang hidden cottage nga nag-inusara sa lapyahan sa Tiklo-Kasag nga iyang safehouse.

Mitingog ang iyang selpon. Gikuha niya sa iyang bulsa. “Okey, Boss, moanha ko karon dayon.” Human sakyi gipaandar dayon ang itom niyang motorsiklo nga misubay sa gamayng dalan-dalan padung sa highway. Sa highway, mibulhot kini lusot sa kangitngit sa kagabhion.

“Husto ka, Simo, sa imong teks, okey ko nga magtakuban ka sa ngan nga tikarol sama sa imong mga kauban.” Mitunol iyang Boss niya og hulagway sa usa ka tawo. “Trabahoa ni, Simo, aw. Tikarol diay, the same price. Niay katunga.” “Okey, Boss.” Gidawat niya ang kuwarta ug hulagway sa luyo niini ang adres ug mga dapit nga kini mag-estambayan. Nanaog siya sa dakong balay diin iyang gilabyan ang nanag-inom nga mga kaubang “hitmen.” Misinggit ang usa. “Shat, Simo!” Mikaway siya sa pagbalibad. Nagdali siya karon balik sa iyang safehouse aron tun-an ang bag-ong assignment. Kon wa siya masayop ika-20 kini nga tawo nga iyang likidahon.

Unsa kahay sala ning tawhana, nga ipapatay man? Gikuha niya ang hulagway. Misiga ang iyang mga mata. Ang mayor nga iyang suod nga higala sa tinun-an pa siya sa kolehiyo. Nahinumdom siya nga si Mario kanunayng molibre niya sa mga higayon nga di moabot ang iyang alawans sa iyang mga ginikanan. “Akoy bahala nimo, Sim, sa tanan.” Busa naluwas siya sa kagutom hasta pagbayad sa mga tuition fee nga wa gyud siya kailis.”Don’t worry, Sim, payable when able kato.” Moingon lang ang iyang higala. Apan ang di makalimtan niya mao tong higayon nga giluwas siya niini gikan sa paregla sa mga bugoy sa Urgello. Gitabangan ug gibukbok siya niadto ug dihang dunggabon unta siya tayming miabot ang iyang higala nga maoy miturse sa bukton ug gibunal sa semento dayong sikad-pamatid ug panumbag sa mga bugoy..

Nakasaksi siya sa kabatid sa paningamot sa iyang higala nga milupig sa mga bugoy nga wa makaaguwanta sa mga bun-og ug nanagan. Gida siya sa ospital sa iyang higala ug giatiman. Dihang siya naayo nagpasalamat siya. “Makabawos ra unya ko nimo, Mar.” Ang katapusan nilang panagkita mao kadtong ROTC Awarding Rites diin siya ang gigantihan isip “Sharpshooter of the year sa pistol ug long rifle. Gikan niadto wa na sila magkita. Mipauli siya sa ila.

Mitawag siya sa iyang, Boss kon unsa sala sa mayor. “Don’t ask questions, do it!”Mao tong nakahukom siya.sa pagdapig sa katarungan. Giuli niy ang patinga sa iyang Boss. Di niya mapatay ang iyang higala. Usa ka gabii, girapido ang iyang safehouse. Salamat nga didto siya nanglingkod sa tuod nga batuganan sa Tikarol kay nagpahayahay sa kaalimuot sa kagabhion.

Napatay niya ang pito ka mga hitmen gamit lang sa iyang pistola, apan may usa nga nakasibat. “Unsa, wa ninyo mapatay si Tikarol!” Misunod ang mga buto-buto. Nakitang nangatumba sila Boss Damian ug sinaligang si Lucio alyas Tabili.

“Dugay na kong nahibawo nga diha ka ni Damian. Nakita ko ikaw diha sa mga hulagway nga gipakita niya kanako, maayo, Sim, nga miampo ka.” Mitanyag diayg serbisyo si Damian kang Mario, apan wa niya dawata kay tinarong ang iyang pagda sa lungsod. Mao diay nga ipapatay siya ni Damian.

Gilabanan siya sa mayor labi nang nasuta nga ang iyang gipamatay mga drug lord ug kurakot nga mga pulitiko. Ang nakapagaag samot sa iyang silot mao ang pagpamatay niya sa mga hitmen sa siyudad ug sa Big Boss sa sindikato sa mga krimen.

Sa paggawas ni Simo sa bilangguan, gisugat siya ni Mayor Mario Halasan nga nagpahiyom. “Kongrats, Tikarol!” Wa una siya motingog; gigakos niya ang mayor. “Patay na ang Tikarol, Mayor,” hunghong niya sa suod niyang higala.

(KATAPUSAN)