Hontiveros mosulod sa politika?
Human miretiro sa Philipine Basketball Association (PBA), ang “Cebuano Hotshot” Dondon Hontiveros gikataho nga nakadawat og tanyag nga mosalmot sa kawa sa politika sa umaabot nga piniliay sunod tuig.
Kasaligang tinubdan nagkanayon nga adunay mga partido sa dakbayan sa Sugbo nga mihaylo sa Sugboanong sikat nga basketbolista nga mokandidato isip konsehal sa habagatang distrito sa siyudad sa Sugbo.
Sa dihang gikuhaan og pamahayag, si Hontiveros mikompirmar niini, apan wala niya gibutyag kon unsa nga partido ang miduol kaniya.
Hinuon iyang gipasabot nga wa pa siya mokomiter niini ug iya kining tubagon sa tukmang panahon.
Sa pagkakaron, nagtutok una siya sa iyang mga proyekto sama sa pagpahigayon og mga basketball clinic alang sa mga kabataan pinaagi sa iyang DH25 training camp ug ingon man pagbisita sa mga charity institutions alang sa iyang mga outreach program.
Kon mahinayon nga magpapili pagka Councilor ug buligan sa maayong palad, ang 40-anyos nga multi-awardee nga Hontiveros andam mopasawo sa iyang eksperiyensiya sa natad sa paugnat sa kusog ngadto sa mga Sugboanon.
Lumad nga taga Basak-Pardo, si Hontiveros nakatungha sa Don Bosco Technological Center.
Nitapon siya sa University of San Jose Recoletos sa iyang pagtungha sa kolehiyo apan nahibalhin sa Cebu Central Colleges (CCC) nga karon mao na ang University of Cebu diin didto nagsugod og kaumol ang iyang basketball career ug hangtod nahatagan og katumanan ang iyang damgo nga mao ang pagtikang sa PBA.
Gawas niini, mapasigarbuhon usab siyang nakarepresentar sa nasod og pipila ka higayon sa mga international competitions.