Ancajas modepensa sa IBF title sa US, Sept. 29
Sa ikaunom nga higayon, depensaan ni International Boxing Federation (IBF) superflyweight world champion Jerwin Ancajas ang iyang titulo karong Septiyembre 29 (Sept. 30 sa Manila) didto sa Pechanga, California.
Ning higayona,iyang ikasangka ang Mexican slugger nga si Alejandro Santiago Barrios.
Ang matchmaker nga si Sean Gibbons mibutyag nga ang pagpakigsangka ni Santiago maoy dakong pagsuway ug pagsukod sa kalidad ni Ancajas (30-1-1M 20KOs) kon unsa siya kaandam alang sa mga dagkong away sunod tuig sa iyang division nga naglakip nila ni Juan Francisco Estrada ug WBC champion World Boxing Council (WBC) champion Srisaket Sor Rungvisai.
“His goal is to fight (them) but right now due to Estrada having a fight September 8, Rungvisai has a fight (on October 6) then they’re going to fight each other. But Jerwin wants to fight guys who are similar in style.”
Orihinal unta nga gikatakda ang maong away sa Septiyembre 14 apan gibutyag ni Gibbons nga ila kining giuswag sa petsa 29 aron paghatag og kahigayonan ni Ancajas nga makapahigayon og saktong ensayo ug pagpangandam.
Si Santiago kasamtangan anaa sa ika-14 sa IBF rating apan pahimangno ni Gibbons nga dili kini angay ka kompiyansaan tungod kay isog og aduna kini igong kusog ug kalig-on.
Sa niaging Marso si Santiago Barrios (16-2-4, 7 KOs) nakatabla ni Jose Martinez. Hinuon sagad sa iyang mga away didto ra usab sa iyang hometown sa Tijuana, Mexico.