WIN NO. 2 TARGET SA CEBU CITY SHARKS

Mga duwa karon:

(Strike Gymnasium, Bacoor) 7 p.m. – Cebu vs Davao Occidental 9 p.m. – Bacoor vs Laguna

Ang pagkutlo sa ilang ikaduhang kadaugan maoy puntariyahon karon sa Cebu City Sharks sa dihang ikasangka niini ang Davao Occidental sa pagbalik sa aksiyon sa Maharlika Pilipinas Basketball League nga ipahigayon karong gabii sa Strike Gymnasium, sa Bacoor.

Ang Sharks ni coach Noberto “Titing” Manalili, nga naghupot sa 1-4 nga baraha, gipaabot nga mosulod sa korte nga taas ang moral tungod sa ilang surprisang kadaugan batok sa defendng champion Batanga Athletics niadtong Agusto 4.

Mangulo sa opensa sa Sharks mao ang beteranong si Patrick Cabahug ug ang kanhi PBA mainstays nga sila si Cesar Catli ug Jondan Salvador. Anaa usab sila si John Abad, Enrico Llanto, Alfred Codilla ug Raffy Oktubre ang makaabag sa mga Sugboanon kinsa gilihi-an og 0-4 sa sayong bahin sa torneyo.

Mga pamilyar nga pangalan sa Cebu basketball ang ikahibagat usab sa Sharks. Kini sama kanila ni Emmanuel Calo ug James Regalado nga maoy mangulo sa Davao Tigers kinsa naghingutas usab sa ilang standing human sa sunodsunod nga kapildihan. Anaa usab kanila ang mga ex-pro nga si Leo Najorda ug Mark Yee.

Kon kahinumdoman, ang mga Sugboanon napuno sa mga pagsaway human nakatala kini og negatibong record sa Philippine basketball sa dihang wala maka-score sa first quarter batok sa Manila Stars niadtong Hulyo 24.

Apan sa ilang uwahing kadaugan, daw sa natabunan napatigbabawan na kini sa usa ka mapasigarbuhon nga kadaugan.

Magsugod ang Cebu City-Davao Oriental match sa alas 7 sa gabii diin mosunod usab sa alas 9 ang takna ang duwa sa host Bacoor Strikers ug sa Laguna Tigers nga gipaluyohan usab sa Coco-life.

Niadtong Sabado, ang Commissioner’s Office nakadesider sa pagkanselar sa mga duwa tungod sa grabing uwan nga mihugpa sa Metro Manila nga nakatanggong sa mga players.