Dakong torneyo sa Cepca karong Oktubre 20-21
Andam na ang tanan alang sa pagpahigayon sa labing dakong torneyo nga idalit sa Cebu Executives and Professionals Chess Association (CEPCA) alang sa ika28 ka mga tuig nga anibersaryo sa asosasyon.
Giulohan og Boy “Chessmoso” Pestaños Memorial Chess Team Tournament, ang kalihukan ipahigayon karong Oktubre 20-21 sa The Barracks Chess Club sa Robinsons Galleria Cebu.
Ang matag partisipanteng team langkuban og tulo ka mga mahduduwa nga adunay average National Chess Federation of the Philippines (NCFP) rating nga 2000.
Ang unrated players nga mosalmot hatagan deretso og rating nga 1800.
Ang kompetisyon mosubay sa 9-round Swiss system.
Ang CEPCA ubos sa pagpangulo sa ilang presidente nga si Engr. Jerry Maratas nakahunahuna pagpahigayon ning maong torneyo isip paghinumdom sa mipanaw na nilang sakop nga si Boy Pestaño.
Si Pestaño, kinsa nagsuwat og chess column ning mantalaan nga giulohan og "Chessmoso" usa ka founding member sa asosasyon.
Dagkong ganting salapi ang naghuwat sa mga mananaog sa torneyo.
Ang kampiyon makabulsa og P20,000, makaangkon og P15,000 ang 2nd placer, P10,000 sa 3rd placer, P5,000 sa 4th placer ug P3,000 sa 5th placer.
Ang mahiluna sa ikaunom ngadto sa ika-10 nga dapit makaangkon og P2,500 matag usa.
Ang mga makaparehistro ning buwana aduna ra’y bayranan nga P1,200 samtang ang magparehistro sa sunod buwan adunay bayranan nga P1,500.