GIDUOL GIPUSIL, PATAY
DUOL SA IYANG TINDAHAN SA HERNAN CORTES ST., DAKBAYAN SA MANDAUE
Gipusil- patay ang usa ka 56 anyos nga negosyante sa usa ka wa mailhing gunman atubangan sa iyang tindahan sa dakbayan sa Mandaue niadtong Miyerkules sa buntag.
Gideklarar nga dead-on-arrival (DOA) sa ospital ang negosyante nga si Johnson Chiaoco, 56, Filipino-Chinese nga tag-iya og paint shop sa dapit human gipusil sa usa ka wa mailhing nagmotorsiklo sa Hernan Cortes St. sa dakbayan sa Mandaue kagahapon sa alas 8:30 sa buntag.
Matod sa hepe sa Mandaue City Police Office (MCPO) Station 4, Chief Inspector Zosimo Jabas, naabtan sa kapulisan ang biktima nga adunay igo sa usa ka bala sa iyang ulo.
Dali siyang gidala sa Chong Hua Hospital, apan DOA na kini.
Gisaysay ni Jabas nga padayong giimbestigar sa kapulisan ang motibo.
“So as of now di sad ta kasulti kon unsay status. Naa tay nakita nga CCTV pero mangita pa tag lain nga footage kay usa ra ka angle nya dili sad klaro. So, pagkakaron nagsige pa ta og subay sa mga CCTV,” matod ni Jabas
Matod sa initial information nga nakuha sa kapulisan, ang biktima nagpa-blotter niadtong Hunyo ning tuiga human makadawat og hulga apan nawala ra kini sa iyang pagtagad.
Matod ni MCPO Director Julian Entoma, maglisod sila sa pag-ila sa gunman tungod kay dili makita ang nawong niini tungod sa gisul-ob nga helmet.
Dugang pa niya, posibleng giplanuhan ang pagpatay ni Chiaoco.
Matod sa usa ka saksi, siya makabantay sa pagpamusil apan aduna siya’y nadungog nga usa ka boto ug iyang nakit-an nga nalub-og na si Chiaoco.
Gitan-aw karon sa kapulisan kon professional killer ang mamumuno ni Chiaoco.
Matod ni Entoma, ni-parking daan ang gunman sa unahan sa tindahan ni Chiaoco nga dapit kon asa kini mohunong.
Dugang niya, posibleng nakahibawo daan ang gunman kung asa padulong si Chiaoco.
“Kon atong makita nga iya gyung giulo, butang ta nga professional siya,” matod ni Entoma
Sa pasiunang impormasyon sa kapulisan, si Chiaoco, aduna’y background sa paggamit og armas kay kini hilig moapil og mga shooting competition apan karon nabutang ang attensyon niini sa pag-atiman og mga hayop.