Traffic lights system sa Sugbo bag-ohon
Walo ka mga investors ang nipakita og interest nga mobubo sa ilang puhonan para pagpalambo sa kasamtangang traffic light system sa dakbayan sa Sugbo.
Si Konsehal Jerry Guardo, chairman sa Committee on Transportation sa konseho, nipadayag nga depektuso ug daghan na og daot ang 30 anyos nga Sydney Coordinated Adaptive Traffic System (SCATS).
Ang maong mga investor gikan sa Australia, Austria, Taiwan ug adunay mga local investor.
Matod ni Guardo kinsa maoy gitahasan ni Mayor Tomas Osmeña sa pagpangita og solusyon sa maong problema nipahibawo nga sa 80 ka intersections sa dakbayan nga adunay traffic lights walo niini ang wala nag-andar.
Gibutyag niya nga ang maong mga dapit sagad maoy problema sa traffic hilabi na kon magpa-ugat ang mga driver ug kon walay traffic enforcer nga ibutang.
Iya usab gipahibawo nga 20 porisyento nalang sa 658 ka detectors kon 118 niini ang nigana nga nahimutang sa 80 ka nagsangang dalan ang nag-andar.
Ang detectors maoy moila sa gidaghanon sa mga sakyanan nga naglumbay sa usa ka karsada ug kon taas ang linya sa mga sakyanan, automatic usab niyang lugwayan ang minuto o segundo aron hamugaway ang dagan.
Sa higayon nga gamay ra ang mga sakyanan, automatic usab mo-adjust ang oras, inay 40 segundos mahimo nalang kining 20 segundos nga igo ra sab makalabang ang mga sakyanan nga naghuwat sa ilang turno.
Si Guardo niingon nga gusto ni Mayor Tomas Osmeña nga ipaubos sa Public Private Partnership ang pag-ilis unya sa traffic system sa dakbayan para sa epektibo nga pagdumala sa trapiko.