DESTABILIZATION DI MOLAMPOS: GUV

Gobernador Hilario Davide III nagtuo nga di makaayo sa nasud kon dunay mahitabo nga distabilisasyon batok kang Presidente Rodrigo Duterte.

Ang Presidente subling nipadayag nga ang grupong Magdalo diin sakop si Senador Antonio Trillanes IV ug ang mga rebeldeng komunista nagplanong lumpagon ang iyang administrasyon.

Apan ang Armed Forces of the Philippines (AFP) ug Philippine National Police (PNP) nipahibawo na nga wa silay nahibaw-ang hulga sa administrasyon karon.

Hugot usab silang naniid karon aron mahibaw-an gilayon kon naa man.

Si Davide nga sakop sa LP wa’y kasayuran kon tinuod ba usab ang hisgutanan sa distabilisasyon batok sa Presidente.

Apan nagtuo siya nga dunay igong intelligence information si Duterte aron sayran ang maong impormasyon.

Atol sa one-on-one interview ni Duterte kauban si Presidential Legal Counsel Salvador Panelo, gihagit niini ang mga nagtinguha pagpalagpot kaniya sa katungdanan nga mohimo na niini karon dayon.

Kon si Davide ang pasulti-on, di maayo nga himuon ang destabilization plot sanglit maghatag lang kini og negatibong epekto ug imahe sa nasud, ilabi na sa operasyon sa kagamhanan.

Una nang namahayag ang liderato sa Philippine National Police ug Armed Forces of the Philippines nga di sila makahimo sa pagpalagpot sa presidente tungod sa hugot nga suporta niini sa ilang hanay.

Masaligon si Davide nga di magpalampuson ang posibleng destabilization plot batok kang Duterte.

Sa kadaghang suliran nga gi-tubang karon sa nasud, dili makatabang kon mapun-an pa kini sa maong problema.

Taliwala sa giingong distabilisasyon, wala’y plano si Duterte nga magpatandog sa iyang pwesto, ilabi na kay di siya maka-uyon kon ang mopuli kaniya mao si Bise Presidente Leni Robredo.