Lapu-Lapu projects wa pa maapektohi sa Train Law
Wa pa masinati ang epekto sa Tax Reform for Acceleration and Inclusion (TRAIN) Law sa mga programa ug proyekto sa kagamhanan sa Lapu-Lapu City.
Nasayran nga ang siyudad adunay dul-an sa P3 bilyones nga annual budget alang sa 2018 nga gi-aprobahan niadtong Oktubre sa miaging tuig og ang dakong pahat niini gitagana sa drainage project.
Si Rolando Duero, department head sa General Services Office (GSO) nagkanayon nga ang ilang buhatan wa pa makasugat nga adunay nalangay sa pagpalit og kagamitan o ubang gikinahanglan alang sa usa ka proyekto gumikan kay wa na magkadimao ang kantidad base sa gi-probahan nga Project Procurement Plan diin natala nang daan ang estimated cost sa maong materials.
Nipasabot ang OIC GSO officer Cleofe Amores nga ang matag departamento mopadala sa ilang purchase request sa GSO nga gibase sa Project Procurement Plan nga giandam nang daan sa miaging tuig.
“Dapat ang material nga paliton dili gyud molapas sa estimated cost diha sa procurement plan,” dugang pa ni Amores.
Sumala pa nga aduna ray ma-pending nga purchase request dili gumikan kay nagkuwang sa pundo apan tungod kay way stock ang specific item o material nga gi-request.
Apan napanglantawan ni Duero nga sa pagsulod sa fourth quarter adunay posibilidad nga ilang masinate nga magkuwang na unya sa budget tungod sa TRAIN Act ilabi na nga pipila sa presyo sa materyales ang kalit nga misaka. “Maybe ma-feel namo ang effect (TRAIN Act) ana ari na sa last quarter basin makuwangan (budget) but for now ang among appropriations okay pa,” sumala pa ni Duero.