Ma-clear kaha si Mike?
Maayo ra gyud nga wala tuguti sa mga
organizers sa rally niadtong Dominggo, nga gipasiugdahan sa Barug PDP Laban pagsuporta sa Duterte administration batok sa illegal drugs, si kanhi Mayor Michael Rama nga mosaka sa stage ug labi pa nga modiskurso. Linahi usab ang thanksgiving mass og rally ang gipasiugdahan sa taga Bando Osmena Pundok Kauswagan (BOPK) didto atubangan sa City Hall. Ang “kanhi laos nga pulitiko” maoy nangulo sa maong kalihukan diin nanawagan siya og kahiusahan.
Kay kon gitugutan pa si Rama nga mosaka sa stage ug mohimo og pakig-pulong, salikwaot alang kaniya. Ngano man? Gumikan kay usa kadto ka anti-drug rally unya motabi siya batok sa illegal nga drugas nga gihinganlan man siya ni Presidente Rodrigo Duterte mismo nga ‘drug protector’. Anaa siya sa listahan sa Presidente sa mga “narco-politicians.”
Kon mi-starring pa og maayo si Mike sa maong kalihukan sigurado nga yam-iran siya sa mga tawo. Narco-politician unya mosalmot pagpakigbatok sa illegal nga drugas. Gikinahanglan usa nga limpiyohan ni Mike ang iyang pangalan, sa dili pa siya mag-apilapil sa susamang kalihukan. Iya man ganing gipanghambog nga si Duterte ang mamahimo nilang campaign manager sa Labella-Rama ticket. Sigurado kaha siya nga i-isa ang ilang mga kamot labi pa siya ni Digong panahon sa kampaniya?
Sa iyang kalit nga pagbisita nako sa DYSS station niadtong miaging semana nga wala gani mo-kortisiya og pananghid una nako, nanghinaot siya nga malimpiyohan ang iyang pangalan sa dili pa magsugod ang kampaniya alang sa 2019 elections. Iyang gibutyag nga kanunay kuno silang magkita ni Duterte og positibo ang ilang panagtagbo.
Sige lang siyag pagawas og hulagway nilang Digong sa iyang Facebook account, apan wala pa ipahibalo sa Presidente nga cleared na si Mike. Hangtod nga dili malimpiyohan ang iyang pangalan mismo sa Presidente magpadayon ang iyang pag-alsa ug pagpas-an nianang iyang extra nga bagahe nga mao ang drug protector image. Bug-at na alang kang Mike labi pa sa iyang pulitikanhong ambisyon.